“मला धाकधूक होती की अंकुश चौधरी…” राज ठाकरेंनी सांगितला ‘तो’ किस्सा

महाराष्ट्र शाहीर या चित्रपटाचा टीझर लाँच सोहळा आज (२० मार्च) मोठ्या थाटामाटात पार पडला. मुंबईत या सोहळ्याचे आयोजन करण्यात आलं होतं. या सोहळ्यामध्ये राज ठाकरे यांनी शाहीर साबळे यांच्या आठवणींना उजाळा दिला. त्याबरोबर त्यांनी अभिनेता अंकुश चौधरीच्या निवडीचा एक किस्साही सांगितला.
आणखी वाचा : Video: ‘महाराष्ट्र शाहीर’ चित्रपटाचा टीझर प्रदर्शित; बाळासाहेब ठाकरे, लता मंगेशकर यांसारख्या दिग्गज व्यक्तिमत्वांची झलक समोर

“बाळासाहेबांना ‘बाळ’ अशी हाक मारणाऱ्या लोकांपैकी एक शाहीर होते. शाहीरांचा प्रवास हा स्वातंत्र चळवळीपासून ते संयुक्त महाराष्ट्र चळवळीपर्यंत असा आहे. जेव्हा मला केदारनं चित्रपटाबद्दल सांगितलं तेव्हा मला धाकधूक होती. मी त्याला प्रश्न विचारला की, शाहीरांचे काम कोण करणार? तर त्याने अंकुश चौधरी उत्तर दिलं.

त्यानंतर मी तो शाहीरांसारखा दिसेल का? असा प्रश्न त्याला विचारला. तर त्याने मला सांगितलं, तो त्यांच्या भूमिकेत शिरेल. मी आज चित्रपटाचा टीझर पाहिला आणि त्यावेळी मला दिसलं की अंकुश हा खरंच भूमिकेत शिरला आहेस”, असे राज ठाकरे म्हणाले. यावेळी राज ठाकरेंनी अंकुश चौधरीचे कौतुक केले.

आणखी वाचा : “तुम्ही जे बोलता…” तेजस्विनी पंडितने नागराज मंजुळेंबद्दल केलेल्या ‘त्या’ वक्तव्यावर आकाश ठोसरची प्रतिक्रिया

दरम्यान ‘महाराष्ट्र शाहीर’ चित्रपटाच्या टीझरमध्ये अंकुश चौधरी शाहीर साबळेंच्या भूमिकेत दमदार अंदाजात झळकत आहे. त्याबरोबर सना शिंदे यांच्याबरोबरच अभिनेत्री अश्विनी महांगडे हीदेखील महत्वपूर्ण भूमिकेत दिसणार आहे. अभिनेत्री मृण्मयी देशपांडे यात लता मंगेशकरांची भूमिका साकारत आहे. तर या चित्रपटाच्या संगीताची धुरा अजय-अतुल यांनी सांभाळली आहे. २८ एप्रिल २०२३ रोजी हा चित्रपट प्रदर्शित होणार आहे.