पत्नी प्रिया मराठेच्या निधनाच्या काही दिवस आधीच शंतनू मोघेची ‘या’ मालिकेत झालेली एन्ट्री, वाहिनीने शेअर केलेला प्रोमो…

प्रिया मराठे आणि शंतनू मोघे हे दोघं २०१२ मध्ये विवाहबंधनात अडकले होते. प्रिया ठाण्याची होती मात्र, शूटिंगमुळे ती अंधेरीत राहत होती. प्रियाच्या रुममेटमुळे दोघांची ओळख झाली. यानंतर ‘आई’ या मालिकेत शंतनू आणि प्रियाने एकत्र काम केलं. मालिका संपताना दोघांमध्ये चांगली मैत्री झाली आणि पुढे या मैत्रीचं रुपांतर प्रेमात होऊन या दोघांनी लग्नबंधनात अडकण्याचा निर्णय घेतला होता. सुरुवातीला या दोघांनी हे नातं गुपित ठेवण्याचा निर्णय घेतला होता. पण, त्यानंतर दोघांनीही कुटुंबीयांना नात्याची कल्पना देऊन थाटामाटात लग्न केलं होतं.

प्रियाच्या कठीण काळात शंतनूने तिची पूर्ण काळजी घेतली. काही दिवसांपूर्वीच शंतनूची ‘स्टार प्रवाह’च्या लोकप्रिय मालिकेच एन्ट्री झाली. ३० ऑगस्टला स्टार प्रवाहने इन्स्टाग्रामवर शंतनूच्या एन्ट्रीचा व्हिडीओ शेअर केला होता. शंतनू मोघे ‘येड लागलं प्रेमाचं’ मध्ये महत्त्वाची भूमिका साकारत आहे. या व्हिडीओला वाहिनीने, “राया – मंजिरीच्या आयुष्यात आलेला हा शंतनू नक्की कोण असेल?” असं कॅप्शन दिलं आहे.

शंतनू सुद्धा सोशल मीडियावर फारसा सक्रिय नसतो. त्याची लेटेस्ट पोस्ट ही मालिकेत एन्ट्री घेतल्यानंतरची आहे. यापूर्वी त्याने मार्च महिन्यात एक व्हिडीओ शेअर केला होता. तर, प्रिया सुद्धा आजारपणामुळे सोशल मीडियापासून दूर होती. ११ ऑगस्ट २०२४ रोजी तिने शेवटची पोस्ट शेअर केली होती.

दरम्यान, प्रिया मराठेच्या निधनानंतर मराठी सिनेविश्वातील अनेक कलाकारांनी आणि तिच्या जवळच्या मित्रमंडळींनी सोशल मीडियावर दु:ख व्यक्त करत तिच्याबद्दलच्या आठवणी, प्रियाने त्यांना केलेली मदत याबद्दलच्या आठवणी सांगितल्या आहेत. प्रियाने आजवर ‘पवित्र रिश्ता’, ‘या सुखांनो या’, ‘तू तिथे मी’, ‘तुझेच मी गीत गात आहे’, ‘तू भेटशी नव्याने’ अशा गाजलेल्या मालिकांमध्ये काम केलं होतं.