“आदरणीय निलेशजी साबळे, आपल्या डोक्यात हवा गेली होती…”, राशीचक्रकार शरद उपाध्येंची पोस्ट चर्चेत, म्हणाले…

शरद उपाध्ये यांनी निलेश साबळेबद्दलचा जुना अनुभव सांगत फेसबूक पोस्ट शेअर केली आहे. निलेशने शोमध्ये आमंत्रित केलं आणि त्यानंतर त्यांना देण्यात आलेली वागणूक, त्यांना आलेला अनुभव शरद उपाध्ये यांनी या पोस्टमध्ये सांगितला आहे. ही पोस्ट सध्या प्रचंड व्हायरल होत आहे.

शरद उपाध्ये यांची पोस्ट

आदरणीय निलेशजी साबळे,
आपल्याला ‘हवा येऊ द्या’च्या दुसऱ्या पर्वातून डच्चू देऊन त्याजागी अभिजीत खांडकेकरला आणल्याची बातमी आज पेपरमध्ये वाचली. वाईट वाटले पण आश्चर्य नाही. मला तुम्ही एकदा बोलावले होते. त्याप्रमाणे मी ११ वाजता पोहोचलो. पण ३ वाजेपर्यंत त्या रुममध्ये कोणीच फिरकले नाही. मला पाणी हवे होते पण एका-दोघांना सांगूनही ते आणतो म्हणून गेले ते आलेच नाहीत. मला रुम सोडू नका असे सांगितले होते. निलेश तुम्ही इतर कलावंतांच्या रुममध्ये जाऊन गप्पा मारीत होतात पण माझ्या रुममध्ये डोकावलात ते थेट ४ वाजता. स्माइलही न देता स्टेजवर गेलात. इतरांचे शूटिंग खूप वेळ केलेत पण मला ६ वाजता बोलावून घाईघाईत १५ मिनिटांत सारे आटोपले. त्यावेळीही इतर कलावंत मध्ये-मध्ये बोलत होते. माझा सारा दिवस फुकट गेला. एडिटींग मध्येही माझी उत्तरे गाळलीत. बाहेर आपली भेट झाली तेव्हा वडिलांच्या नात्याने काही सल्ले दिले. पण, कार्यक्रमाचे प्रमुख म्हणून आपल्या डोक्यात हवा गेली होती.

दुस-याच्या विषयाबद्दल आदर ठेवायचा असतो पण तुम्ही बेपर्वा होतात. त्याचवेळी मला वाटले की, अहंकार अतिवाईट. गर्विष्ट माणसाचे अध:पतन होते. एखादी पोस्ट मिळाली की ताठा येतो आणि सर्वनाश होतो. स्टेजवर तुम्ही साऱ्यांना आपलेसे केले नाही. आपले सादरीकरणही आकर्षक
होत नव्हते. या साऱ्याचा परिणाम म्हणजे तुम्हाला चॅनेलने बाहेर काढले. निलेशजी स्वभाव मनमिळाऊ असावा, साऱ्यांना सांभाळून घ्यावे मग सारे
एकजुटीने काम करून कार्यक्रमाची चर्चा होईल. अभिजीत खांडकेकर ही धुरा चांगली सांभाळतील. मला त्यांचा सहवास मिळाला आहे. आपण अनुभवी आहात, त्यांना मार्गदर्शन करा. इंडस्ट्रीत आपल्याविषयी असलेले गैरसमज आपल्या चांगल्या कामाने दूर करा. आपल्याला ईश्वराची
साथ लाभो ही विनंती.

शरद उपाध्ये यांच्या या पोस्टवर नेटकऱ्यांनी देखील असंख्य प्रतिक्रिया देखील दिल्या आहेत. दरम्यान, ‘चला हवा येऊ द्या’ कार्यक्रमाबद्दल सांगायचं झालं, तर यंदा या शोमध्ये कुशल बद्रिके, श्रेया बुगडे आणि भारत गणेशपुरे हे कलाकार झळकणार आहेत. यंदा या कार्यक्रमाचं स्वरुप बदललं असून, विविध ठिकाणी या शोमध्ये सहभागी होण्यासाठी स्पर्धकांच्या ऑडिशन्स सुरू आहेत.