शशांक केतकर ४० वर्षांचा झाला; शेअर केली खास पोस्ट, म्हणाला, “या सगळ्यांसाठी मला खंबीरपणे उभं…”

सध्या शशांक ‘मुरांबा’ या मालिकेत प्रमुख भूमिकेत दिसत आहे. यामध्ये त्याने अक्षय ही भूमिका साकारली आहे. रमा-अक्षयची जोडी प्रेक्षकांच्या मनावर दीर्घ काळापासून राज्य करत आहे. अभिनेता त्याच्या भूमिकांमुळे अनेकदा चर्चेत असतो.

अभिनेता सोशल मीडियावरदेखील सक्रिय असतो. त्याच्या व्यावसायिक तसेच खासगी आयुष्याबद्दल तो व्यक्त होताना दिसतो. समाजातील अनेक समस्यांवर तो स्पष्ट आणि उघडपणे बोलतो. आता अभिनेत्याने नुकतीच एक पोस्ट शेअर केली आहे. ही पोस्ट त्याच्या वाढदिवसाच्या सेलिब्रेशनची आहे.

“४० नुसतं म्हणायला…”

अभिनेत्याने ४० व्या वाढदिवसाचे काही फोटो एकत्र करत एक व्हिडीओ तयार केला असून तो सोशल मीडियावर शेअर केला आहे. ज्यामध्ये त्याची पत्नी, आई-वडील, तसेच त्याची दोन्ही मुले आहेत. मुलांचे चेहरे मात्र या फोटोंमध्ये दिसत नाहीत. काही फोटोंमध्ये त्याचे आई-बाबा त्याला जेवणाचा घास भरवताना दिसत आहेत. एका फोटोमध्ये तो त्याच्या मुलांसह निवांत बसलेला दिसत आहेत. तर आणखी एका फोटोत प्रियांका व शशांक दिसत आहेत. तसेच, इतर काही फोटोंमध्ये त्याचे इतर नातेवाईकदेखील दिसत आहेत.

हा व्हिडीओ शेअर करताना लिहिले, “पोस्ट थोडी लेट आहे पण ग्रेट आहे. १५ सप्टेंबरला मी ४० वर्षांचा झालो. मी खरंच सांगतो की इतका समाधानी मी याआधी कधीच नव्हतो. ४० नुसतं म्हणायला, आजूबाजूला ही सगळी माझी माणसं आहेत, त्यामुळे २० वर्षांचा झालोय असंही वाटतं नाही.”

पुढे अभिनेत्याने लिहिले, “उद्या अजून कितीही वय वाढलं तरी या सगळ्यांसाठी मला खंबीरपणे उभं राहायचं आहे. जे यांच्या प्रेमामुळे आणि विश्वासामुळे शक्य होईल.”

नेटकरी काय म्हणाले?

आता अभिनेत्याचा या पोस्टवर अनेकांनी कमेंट करत शशांकला शुभेच्छा दिल्या आहेत. तर अनेकांनी शशांकच्या मतावर सहमती दर्शवली आहे. एकाने लिहिले, “खरं आहे. आपण आपल्या माणसांच्या आनंदातच खूप समाधानी असतो. तुमचं वाढदिवसाचं सेलिब्रेशन आवडलं. आपली माणसं आपला आनंद.” दुसऱ्या एका नेटकऱ्याने लिहिले, “४० वर्षांचा झाला आहेस असं वाटत नाही.”

एका नेटकऱ्याने लिहिले, “अगदी खरं आहे”, आणखी एका नेटकऱ्याने शशांकचे कौतुक करत लिहिले, “तू खूप निर्मळ मनाचा आहे”, दुसऱ्या एका नेटकऱ्याने लिहिले, “किती गोड”, अशा अनेक कमेंट्स पाहायला मिळत आहेत. अनेकांनी तुझं कुटुंब गोड असल्याचे लिहिले आहे.

दरम्यान, आगामी काळात अभिनेता कोणत्या भूमिकांतून प्रेक्षकांचे मनोरंजन करणार हे पाहणे महत्वाचे ठरणार आहे.