Shark Tank India 2 : पाच आठवड्यात शार्क्सनी केली ४० कोटींहून अधिक गुंतवणूक; वाचा कोणत्या शार्कनी किती पैसे गुंतवले?

गेल्या सीझनमध्ये नमिता थापर हिने कमी गुंतवणूक केली असली तरी या नव्या सीझनमध्ये ५ आठवड्यानंतर समोर आलेले आकडे पाहता नमिता थापर ही सध्या प्रथम क्रमांकावर आहे. सीझन २ सुरू होऊन ५ आठवडे झाले आहेत आणि नुकतंच सोनी टेलिव्हिजनने यासंदर्भातील माहिती जाहीर केली आहे. एका व्हिडिओच्या माध्यमातून कोणत्या शार्कने आत्तापर्यंत किती रुपयांची गुंतवणूक केली आहे याचे आकडे मांडले आहेत.

आणखी वाचा : ‘पठाण’ चित्रपटात शाहरुख खानने सांगितलं ‘किंत्सुगी’चं महत्त्व; काय आहे या जपानी कलेचा खरा अर्थ?

या स्पर्धेत एमक्यूअरची सीइओ नमिता थापर पहिल्या क्रमांकावर आहे तिने आत्तापर्यंत १०.२५ कोटी रुपयांची गुंतवणूक केली आहे. खालोखाल लेन्सकार्टचा सीइओ पियुष बन्सलने विवध कंपन्यांमध्ये ८.८६ कोटी एवढी गुंतवणूक केली आहे. बोट कंपनीचा सीइओ अमन गुप्ताने सुद्धा तब्बल ८.२६ कोटींची गुंतवणूक या दुसऱ्या सीझनमध्ये केली आहे. शादी.कॉमचा सीइओ अनुपम मित्तलने आणि शुगर कॉस्मेटीक्सची सीइओ विनीता सिंगने मात्र यंदाच्या सीझनमध्ये अनुक्रमे ७.२९ कोटी आणि ४.६१ कोटी एवढीच रक्कम गुंतवली आहे.

अशनीर ग्रोव्हरच्या ऐवजी कारदेखो कंपनीचा सीइओ अमित जैनला फारशा भागांमध्ये संधी मिळाली नसल्याने त्याने आत्तापर्यंत केवळ ३.६६ कोटींची गुंतवणूक केली आहे. सगळ्या शार्क्सनी मिळून या दुसऱ्या सीझनच्या ५ व्या आठडव्यापर्यंत ४२.९३ कोटी रुपये वेगवेगळ्या कंपन्यांमध्ये गुंतवले आहेत. येत्या काही भागांमध्ये हे शार्क्स आणखी बरीच गुंतवणूक करतील अशी अपेक्षा आहे. हा कार्यक्रम तुम्ही सोनी टेलिव्हिजनवर सोमवार ते शुक्रवार रात्री ९ वाजता बघू शकता, तसेच सोनी लीव्ह या ओटीटी प्लॅटफॉर्मवरही याचे भाग उपलब्ध आहेत.