२६ जुलै १९९४ रोजी ‘तू-तू मैं-मैं’ ही मालिका प्रेक्षकांच्या भेटीला आली आणि तुफान लोकप्रिय झाली. या मालिकेत सासू-सुनेमधील कुरबुरी दाखवल्या गेल्या होत्या. आजही प्रेक्षकांच्या मनात या मालिकेचं वेगळं स्थान आहे. तर लवकरच या मालिकेचा दुसरा भाग प्रेक्षकांच्या भेटीला येणार असल्याचं काही दिवसांपूर्वीच समोर आलं होतं. आता या मालिकेत सुनेच्या भूमिकेत कोण दिसणार यावर अभिनेत्री सुप्रिया पिळगावकर यांनी भाष्य केलं आहे.
‘तू-तू मैं-मैं’ मालिकेमध्ये सुप्रिया पिळगावकर सुनेच्या भूमिकेत होत्या तर अभिनेत्री रीमा लागू यांनी या मालिकेत सासूची भूमिका साकारली होती. तर आता या मालिकेच्या दुसऱ्या भागामध्ये सुप्रिया पिळगावकर सासूच्या भूमिकेत दिसणार आहेत. त्यामुळे या मालिकेत सुनेच्या भूमिकेत कोण दिसणार हे जाणून घेण्यासाठी प्रेक्षक आतुर झाले आहेत.
याबाबत बोलताना सुप्रिया पिळगावकर म्हणाल्या, “या मालिकेचे दिग्दर्शक निर्माते सुनेच्या भूमिकेसाठी कोणत्या अभिनेत्रीला कास्ट करणार आणि तिची आणि माझी केमिस्ट्री कशी निर्माण होणार हे पाहणं खूप औत्सुक्याचं आहे. कारण रीमाजी आणि माझ्यामध्ये खूप चांगली केमिस्ट्री तयार झाली होती. आत्ताच्या घडीला अनेक उत्तम अभिनेत्री आहेत त्यामुळे या भूमिकेसाठी एका अभिनेत्रीची निवड करणं हे खरोखरच कठीण आहे. आमची मालिका म्हणजे ‘टॉम ॲण्ड जेरी’सारखी आहे. त्यामुळे उत्स्फूर्त अभिनेत्रीला दिग्दर्शक कास्ट करतील.”
दरम्यान, ‘तू-तू मैं-मैं’ या मालिकेचं दिग्दर्शन सचिन पिळगावकर यांनी केलं होतं. आता या मालिकेच्या पुढील भागावर ते काम करत आहेत. त्यामुळे ही नवी मालिका प्रेक्षकांच्या कधी भेटीला येणार आणि यात कोण कलाकार दिसणार हे जाणून घेण्यासाठी प्रेक्षक खूप आतुर झाले आहेत.
