बॉलीवूडची आघाडीची अभिनेत्री प्रियांका चोप्रा हिच्या पर्पल पेबल पिक्चर्स निर्मित व्हेंटीलेटर चित्रपटाचा ट्रेलर नुकताच सोशल मिडीयावर लाँच करण्यात आला. मराठी सिनेसृष्टीतील मातब्बर मंडळी एकाच पडद्यावर पाहण्याची संधी या चित्रपटातून मिळणार, ही मंडळी कोण असतील हे जाणून घेण्यासाठी प्रेक्षक उत्सुक होते. अखेर या गोष्टीवरून पडदा उठलेला आहे. निखिल रत्नपारखी, राहुल सोलापूरकर, सुकन्या कुलकर्णी, जितेंद्र जोशी, अच्युत पोद्दार, विजू खोटे, सुलभा आर्या, स्वाती चिटणीस या सगळ्यांबरोबरच तब्बल १८ वर्षांनी आशुतोष गोवारिकर पुन्हा एकदा मराठी चित्रपटसृष्टीत एक अभिनेता म्हणून पदार्पण करत आहेत.
चित्रपटाच्या टीझरमध्ये संपूर्ण स्टारकास्ट पाहावयास मिळते. गजानन काका व्हेंडिटलेटरवर आहेत, अशी बातमी निखिल रत्नपारखी सर्वांना यात देताना दिसतो. त्यानंतर गजानन काकांची तब्येत बिघडल्याची बातमी सगळीकडे पसरते. या दरम्यान घडलेल्या गोष्टी मजेशीर पद्धतीने दाखवण्याचा प्रयत्न यात करण्यात आला आहे. पण, गजानन काका कोण आहेत याचा टीझरमध्ये खुलासा करण्यात आलेला नाही. साहजिकच त्यासाठी आपल्याला चित्रपटाच्या ट्रेलरची वाट पाहावी लागेल. दरम्यान, चित्रपटाची निर्माती प्रियांका चोप्रा हिनेदेखील तिच्या ट्विटर अकाउंटवरून चित्रपटाचा टीझर ट्विट केला आहे.
“आमची मेहनत अखेर फळाला आली असून…या चित्रपटाचा टीझर लाँच करण्यात आला आहे. आम्ही हा चित्रपट बनवताना लुटलेली मजा प्रेक्षक नक्कीच अनुभवतील,” असा विश्वास दिग्दर्शक राजेश मापुसकर यांनी दाखवला आहे. दरम्यान या चित्रपटातील कलाकारांविषयी बोलताना, “माझ्या चित्रपटातील पात्र खरी वाटावी आणि लोकांपर्यंत ती सहज पोहोचावी या उद्देशाने सगळ्याच पात्रांची निवड केल्याचे, दिग्दर्शक राजेश मापुस्कर यांनी म्हटले तर आशुतोषची अभिनय शैली १८ वर्षांनी पुन्हा अनुभवणे प्रेक्षकांना सुखावेल, असा विश्वासही त्यांनी व्यक्त केला.  अशी ही दिग्दर्शक राजेश मापुसकर यांची फौज पर्पल पेबल पिक्चर्स निर्मित आणि झी स्टुडिओ प्रस्तुत ‘व्हेंटीलेटर’ या चित्रपटातून येत्या ४ नोव्हेंबरला संपूर्ण महाराष्ट्राच्या भेटीला येणार आहे.

https://twitter.com/priyankachopra/status/784282763172032512