लोकसत्ता प्रतिनिधी
मुंबई : प्रदुषणाच्या विळख्यातून मुंबईची सुटका करण्यासाठी मुंबई महानगरपालिकेने विविध उपाययोजना करण्यास सुरुवात केली आहे. त्याचाच एक भाग म्हणून कचरा जाळणाऱ्यांविरूद्ध कारवाईचा बडगा उगारण्यात येणार आहे. नागरिकांनी कचरा जाळणाऱ्यांविरोधात ‘मुख्यमंत्री स्वच्छ मुंबई हेल्पलाईन ८१६९६-८१६९७’वर छायाचित्रासोबत तक्रार नोंदवावी, असे आवाहन मुंबई महानगरपालिकेकडून करण्यात आले आहे.
मुंबईमधील वाढते वायू प्रदूषण आणि धुळ नियत्रणासाठी मुख्यमंत्री एकनाथ शिंदे यांच्या सूचनेनुसार महानगरपालिका प्रशासनाने निरनिराळ्या उपाययोजना करण्यास सुरुवात केली आहे. मुंबई महानगरपालिका आयुक्त इक्बाल सिंह चहल यांच्या निर्देशानुसार अतिरिक्त महानगरपालिका आयुक्त (पश्चिम उपनगरे) डॉ. सुधाकर शिंदे यांच्या मार्गदर्शनाखाली २४ प्रशासकीय विभागांमध्ये प्रदूषण रोखण्यासाठी निरनिराळ्या उपाययोजना करण्यात येत आहे. या उपारयोजनांची पायमल्ली करणाऱ्यांविरोधात कारवाईचा बडगा उगारण्यात येत आहे.
आणखी वाचा-‘मेट्रो २ ब’ मार्गिका : प्रवाशांना स्थानकांबाहेर बस, टॅक्सी, रिक्षा मिळणार
राज्य सरकारच्या पर्यावरण व वातावरणीय बदल विभागाने २६ ऑक्टोबर रोजी वायू प्रदूषण नियंत्रणासाठी मार्गदर्शक तत्वे जारी केली आहेत. त्यातील अनुक्रमांक ९ मधील अनुपालन करण्याच्या उद्देशाने महानगरपालिकेच्या ‘मुख्यमंत्री स्वच्छ मुंबई हेल्पलाईन ८१६९६-८१६९७’ या व्हॉट्सॲप सेवा क्रमांकावरील तक्रार सादरीकरणाच्या टॅबमध्ये ‘कचरा जाळणे’ हा पर्याय अद्ययावत करण्यात आला आहे.
उघड्यावर कचरा जाळणे, हा पर्यावरणविषयक कायदे आणि भारतीय दंड विधानानुसार गुन्हा आहे. त्यासाठी कायद्यात कठोर दंडात्मक कारवाईची तरतूद आहे. मात्र, नागरिक अनेकदा उघड्यावर कचरा जाळून विल्हेवाट लावतात आणि पर्यायाने कायद्याचे उल्लंघन करतात. कायद्यानुसार उघड्यावर कचरा जाळणे हे उपद्रवी कृत्य म्हणून गणले जाते. मात्र आता उघड्यावर कचरा जाळून प्रदूषण करणाऱ्यांची गय केली जाणार नाही, असा स्पष्ट इशारा महानगरपालिका घनकचरा व्यवस्थापन विभागाने दिला आहे.
आणखी वाचा-मुंबई पोलिसांची अमली पदार्थ तस्करीवर मोठी कारवाई, धारावी-दहिसरमध्ये ५ कोटीचा माल जप्त
मुंबई महानगर व परिसरात वायू प्रदूषण वाढत आहे. ही बाब लक्षात घेऊन नागरिकांनी वायू प्रदूषण रोखण्याच्या दृष्टीने महानगरपालिका प्रशासनास सहकार्य करावे. कचरा जाळताना कोणी आढळल्यास त्याची तक्रार ‘मुख्यमंत्री स्वच्छ मुंबई हेल्पलाईन ८१६९६-८१६९७’ या व्हॉट्सॲप सेवा क्रमांकावर ताबडतोब नोंदवावी. सोबत छायाचित्र जोडावे, असे आवाहन उप आयुक्त (घनकचरा व्यवस्थापन) चंदा जाधव यांनी केले आहे.
