थकीत मानधन, बोनससाठी आझाद मैदानावर मंगळवारी आशा स्वयंसेविकांचा एल्गार

‘स्वस्थ नारी, सशक्त परिवार’ या उपक्रमाच्या शिबिरांच्या आयोजनामध्ये अधिकारी व्यग्र असल्याने आशा स्वयंसेविकांना ८ ऑक्टोबर रोजी भेटीची वेळ देण्यात आली. त्यामुळे संतप्त झालेल्या आशा स्वयंसेविकांनी मंगळवारी आझाद मैदानावर आंदोलन करण्याचा निर्णय घेतला आहे.

असंसर्गजन्य आणि संसर्गजन्य रोगांना प्रतिबंध आणि नियंत्रण करणे, बालके आणि महिलांची आरोग्य तपासणी, पोषण, लसीकरण, जननी-शिशू आरोग्य योजना, गरोदर मातांची सेवा, प्रसूती प्रश्चात सेवा, कुटुंब कल्याण सेवा यासारख्या अत्यावश्यक सेवा मुंबईतील झोपडपट्टीपासून टाॅवरमधील नागरिकांना उपलब्ध करून देण्यासाठी आशा स्वयंसेविका ऊन-पावासाची तमा न बाळगता झटत असतात.

राष्ट्रीय आरोग्य अभियानांतर्गत सुमारे ७५० आशा स्वयंसेविका मुंबई महानगरपालिकेच्या नागरी आरोग्य केंद्रात कार्यरत आहेत. मात्र जूनपासून त्यांना मानधन मिळाले नसल्याने त्यांच्यावर उपासमारीची वेळ आली आहे. मात्र जुलैचे मानधन येत्या १० ऑक्टोबरपर्यंत देण्यात येईल, असे आश्वासन अधिकाऱ्यांनी सोमवारी आंदेालनाच्या वेळी आशा स्वयंसेविकांना दिले. परंतु ऑगस्ट व सप्टेंबरमधील मानधनाबाबत त्यांनी कोणतीही माहिती दिली नाही. त्यामुळे आशा स्वयंसेविका संतप्त झाल्या आहेत.

मुंबई महानगरपालिकेतील आशा स्वयंसेविकांना आरोग्य स्वयंसेविकांइतका बोनस देण्याबाबतचा प्रस्ताव २०२२ पासून प्रलंबित आहे. या बाबतीत मुंबई महानगरपालिकेने अद्याप निर्णय घेतलेला नाही. नवी मुंबई, ठाणे, मिरा भाईंदर, उल्हासनगर, वसई विरार, भिवंडी या महानगरपालिकेतील आशा स्वयंसेविकांना दरवर्षी महानगरपालिकेकडून बोनस दिला जातो. मात्र मुंबई महानगरपालिकेकडून त्यांना बोनस देण्यासाठी टाळाटाळ केली जाते.

अवघ्या २५ दिवसांवर दिवाळी आल्याने त्यापूर्वी सर्व मानधन व नवी मुंबई महानगरपालिकेप्रमाणे दिवाळीचा बोनस मिळावा यासाठी सर्व आशा स्वयंसेविका बुधवारी आझाद मैदानामध्ये आंदोलन करणार असल्याची माहिती महाराष्ट्र राज्य आशा गटप्रवर्तक व आशा स्वयंसेविका संघाचे कोषाध्यक्ष राजेश सिंह यांनी दिली.