‘गोव्याच्या खाद्यसंस्कृतीचा भाग असलेल्या गोमांसावर बंदी घालणार नाही’

गेल्या काही दिवसांत भाजपचे सरकार सत्तेत आल्यानंतर हरियाणा आणि महाराष्ट्र या राज्यांमध्ये गोहत्याप्रतिबंधक कायद्याच्या अंमलबजावणीखाली गोमांसाच्या विक्रीवर बंदी घालण्यात आली. यासंदर्भात पार्सेकरांना विचारले असता, प्रत्येक राज्याला स्वत:चा दृष्टीकोन असल्याचे सांगितले. मी त्याविषयी भाष्य करणार नाही. मात्र, गोव्याचा मुख्यमंत्री म्हणून गोमांसावर राज्यात कधीही बंदी घालणार नाही, हे मी स्पष्ट करू इच्छितो, असे त्यांनी म्हटले. त्यामुळे आता त्यांनी घेतलेल्या पवित्र्याविषयी भाजपमधून काय प्रतिक्रिया उमटतात, याकडे सगळ्यांचे लक्ष लागले आहे. याशिवाय, गोव्यात गेल्या काही दिवसांपासून गोमांसाची विक्री थांबविण्यासाठी व्यापारांवर दबाव आणला जात आहे. यासाठी गायींची वाहतूक करणाऱ्या गाड्या अडवून गाडीच्या चालकाला मारणे आणि गाडीतील सगळ्या गायी सोडून देणे यांसारखे प्रकार घडत असल्याची येथील व्यापारांची तक्रार आहे. मात्र, गोमांस विक्री करणाऱ्या व्यापाऱ्यांना अशी कोणतीही अडचण असेल तर, त्यांनी शासनाकडे तक्रार करावी, असे पार्सेकरांचे म्हणणे आहे.