भाजपाच्या नेत्यांची आज बैठक; विधान परिषदेची तयारी; आमदारांचा पंचतारांकित हॉटेलात मुक्काम

 विधान परिषद निवडणुकीत गुप्त मतदान असल्याने आणि संख्याबळापेक्षा अधिक म्हणजे पाच उमेदवार भाजपाने उभे केल्याने मतांची जमवाजमव करण्यासाठी वरिष्ठ नेत्यांनी लहान पक्ष आणि अपक्ष आमदारांशी चर्चा सुरू केली आहे. महाविकास आघाडीतील काही आमदारांना फोडण्याचाही भाजपाचा इरादा आहे.

राष्ट्रवादी काँग्रेसकडे पुरेसे संख्याबळ असले तरी एकनाथ खडसे यांना कसे अडचणीत आणता येईल आणि शिवसेनेलाही कसा धक्का देता येईल, या दृष्टीने भाजपा रणनीती आखत आहे. संख्याबळानुसार काँग्रेसचा दोनपैकी एक उमेदवार निवडून येणे अवघड आहे. भाजपाचे पाचही उमेदवार विजयी व्हावेत, यासाठी पहिल्या, दुसऱ्या व तिसऱ्या पसंतीची मते प्रत्येक आमदाराने कोणाला द्यावीत, याचे नियोजन वरिष्ठ नेत्यामध्ये सुरू आहे. निवडणूक २० जूनला असली तरी आमदारांनी १८ तारखेपर्यंत मुंबईत दाखल व्हावे, अशा सूचना भाजपाने दिल्या असून त्यांची व्यवस्था ‘ताज प्रेसिडेंट’ या पंचतारांकित हॉटेलमध्ये करण्यात आली आहे. त्या वेळी त्यांनी उमेदवारांना कशा पद्धतीने मतदान करावे, याबाबत सूचना दिल्या जाणार असल्याचे ज्येष्ठ नेत्याने सांगितले.

पंतप्रधान नरेंद्र मोदी सरकारला आठ वर्षे झाली असून सरकारची कामगिरी जनतेपर्यंत पोहोचविण्यासाठी केंद्रीय मंत्री व खासदारांना प्रत्येकी किमान ७५० किमी प्रवास करण्याच्या सूचना देण्यात आल्या आहेत. गरीब कल्याण योजनेसह अन्यही कामांच्या नियोजनाबाबत प्रदेश नेत्यांच्या गुरुवारच्या बैठकीत आढावा घेतला जाणार आहे.