‘राहुल गांधी फेक है’, विनोद तावडे यांचे प्रत्युत्तर

निविदा उद्धव सरकारच्या काळात

‘राहुल गांधी फेक है’ असा प्रत्युत्तर प्रचार भाजपने सुरू केला असून त्याबाबत तावडे म्हणाले, की धारावीच्या पुनर्विकासाच्या कामाची निविदा उद्धव ठाकरे मुख्यमंत्री असताना महाविकास आघाडी सरकारच्या काळात काढण्यात आली. त्या वेळी अदानींबरोबर अबुधाबीतील शेखशी संबंधित सेकलिंक कंपनीनेही निविदा भरली होती. रेल्वेने जमीन दिल्यानंतर या प्रकल्पाच्या अटींमध्ये बदल झाला व त्यानुसार पुनर्विकासाचे काम सुरू आहे. धारावीत राहात असलेल्या प्रत्येकाला पक्के घर आणि छोट्या व मध्यम उद्याोगांना २२५ चौरस फुटांचे गाळे देऊन योग्य पद्धतीने पुनर्वसन केले जाणार आहे. सेकलिंक कंपनीला कंत्राट मिळाले नाही, म्हणून गांधी विरोध करीत आहेत का, अशी विचारणा तावडे यांनी केली.

हेही वाचा : कोळीवाडीचा मतदानावर बहिष्काराचा निर्णय

u

काँग्रेसकडूनही कंत्राटे

माजी पंतप्रधान राजीव गांधी यांच्या कार्यकाळात आपल्याला अनेक प्रकल्पांची कामे मिळाल्याचे अदानींनीच सांगितले आहे. राजस्थानात तत्कालीन मुख्यमंत्री अशोक गेहलोत यांच्या कार्यकाळात ४६ हजार कोटी रुपयांचा सौर ऊर्जा प्रकल्प, जयपूर विमानतळ, तेलंगणामधील रेवंत रेड्डी सरकारने केलेले १२ हजार ४०० कोटी रुपयांचे करार, माजी पंतप्रधान मनमोहन सिंग सरकारच्या काळात सहा एसईझेड, छत्तीसगडमध्ये तत्कालीन मुख्यमंत्री भूपेंद्र बघेल यांच्याकडून खाणींचे कंत्राट अशी अनेक कामे अदानींच्या कंपन्यांना काँग्रेस सरकारांकडून मिळाली आहेत. तरीही राहुल गांधी हे पंतप्रधान नरेंद्र मोदी व भाजप सरकारचा अदानींशी संबंध जोडून, काँग्रेस आणि अदानींमधील जुने नाते लपवू पाहात आहेत, अशी टीका तावडे यांनी केली.