मुंबई: शेअर मार्केटमध्ये गुंतवणूकीतून चांगला परतावा देण्याच्या नावाखाली दहिसर येथील लेखापालाची सुमारे साडे तीन कोटी रुपयांची सायबर फसवणूक झाल्याचा प्रकार घडला आहे. आरोपींनी बनावट ट्रेडिंग अॅप्लिकेशन तयार करून त्याद्वारे तक्रारदाराला चांगला फायदा होत असल्याचे भासवले. याप्रकरणी गोरेगाव व काशिमिरा परिसरात दक्षिण प्रादेशिक सायबर पोलिसांनी कारवाई करून दोघांना अटक केली. त्यात एक आरोपी बनावट कंपनी तयार करून त्याच्या बँक खात्यावर सायबर फसवणूकीची रक्कम स्वीकारत असल्याचे निष्पन्न झाले आहे. दहिसर येथील रहिवासी असलेले २१ वर्षीय तक्रारदार लेखापाल म्हणून काम करतात. काही कंपन्यांमध्ये ते भागिदारी तत्त्वावरही काम करतात. ते शेअर मार्केटमध्ये गुंतवणूक करत असतात. तसेच ऑनलाईन शेअर मार्केटबद्दल सर्च करत असतात.
त्यांच्याशी व्हॉट्सअॅपद्वारे संपर्क साधून त्यांना गणपती ट्रेड नावाच्या ग्रुपमध्ये सहभागी होण्यास आरोपीने सांगितले. तक्रारदार सहभागी झाल्यानंतर त्या ग्रुपवर देण्यात येणाऱ्या माहितीच्या आधारे गुंतवणूक केल्यास फायदा होत असल्याचे दिसून येत होते. ग्रुपमधील अनेक सदस्य त्यांना झालेल्या नफ्याचे स्क्रीन शॉर्ट ग्रुपमध्ये शेअर करत होते. त्यामुळे तक्रारदाराचा विश्वास बसला. त्यानंतर तक्रारदाराला लिंक पाठवून प्रीमियम ग्रुपवर सहभागी होण्यास सांगितले. तेथे तक्रारदारला लिंक पाठवून मास९९ हे अॅप्लिकेशन डाऊनलोड करण्यास सांगण्यात आले. त्या अॅपवर तक्रारदाराने थोडे थोडे करून तीन कोटी ६३ लाख रुपये जमा केले. त्यानंतर तक्रारदाराने ती रक्कम काढण्याचा प्रयत्न केला असता रक्कम काढता आली नाही. त्याबाबत ग्रुप अॅडमिनशी संपर्क साधला असता त्यांनी रक्कम काढण्यासाठी अधिक रक्कम भरण्यास सांगितले. त्यामुळे आपली फसवणूक झाल्याचे तक्रारदाराच्या लक्षात आले. त्यांनी याप्रकरणी दक्षिण प्रादेशिक सायबर पोलिसांकडे तक्रार केली. पोलिसांनी गुन्हा दाखल करून तपासाला सुरूवात केली. अखेर पोलिसांनी याप्रकरणी अदनान शमशुद्दीन खान(२७) व मोहम्मद तन्वीर मोहम्मद इम्तियाज खान(३१) यांना नुकतीच अटक केली.
तपासात तक्रारदार यांना त्यांच्या बँक खात्यातून २१ मार्चला बँक खात्यात रक्कम जमा करण्यास सांगण्यात आली होती. त्यातील चार लाख ८९ हजार रुपये एका बँक खात्यात वळते करण्यात आले. ती रक्कम खातेधारकाने धनादेशाद्वारे काढली. ते खाते आरोपी अदनान याचे असल्याचे निष्पन्न झाले. त्यानंतर काशिमिरा येथून खानला अटक केली.
याप्रकरणातील १९ लाख रुपये वेगवेगळ्या बँक खात्यांमध्ये वळते करण्यात आले होते. ती रक्कम सीडब्ल्यूएफएस प्रा. लि. या या कंपनीच्या खात्यात जमा झाल्याचे समजले. ती कंपनी अस्तित्वात नसल्याचे तपासात निष्पन्न झाे. त्या कंपनीच्या संचालकाचा शोध घेण्यात आला. त्यानुसार तन्वीरला गोरेगाव येथून अटक करण्यात आले.
