मुंबई विमानतळावरून ५ कोटींचे सोने जप्त, दोघांना अटक

तस्करी करून सोने देशात आणण्याचे प्रकार वाढत आहे. याविरोधात कारवाई करण्यासाठी सीमाशुल्क विभाग सक्रिय झाला आहे. शनिवारी मुंबईच्या छत्रपती शिवाजी महाराज आंतरराष्ट्रीय विमानातळावरून दोन वेगवेगळ्या घटनांमध्ये दोघांना अटक करून सुमारे ५ कोटी रुपये किंमतीचे सोने जप्त करण्यात आले. पहिल्या घटनेत विमानतळाच्या लाऊंज परिसरात काम करणाऱ्या एका कर्मचाऱ्याला अटक करण्यात आली असून त्याच्याकडे सुमारे २ हजार ८०० ग्रॅम सोने सापडले. त्याने सोन्याची भुकटी मेणात दडवली होती. त्याची किंमत सुमारे २ कोटी ४८ लाख रुपये एवढी आहे.

दुसऱ्या घटनेत एका कंत्राटी कर्मचाऱ्याला अटक करून २ कोटी ६२ लाख रुपये किंमतीचे २ हजार ९५० ग्रॅम सोने जप्त करण्यात आले. या कर्मचाऱ्याने आपल्या जॅकेटमध्ये सोने दडवले होते, असे सीमा शुल्क विभागाने सांगितले.

सोन्याच्या तस्करीसाठी या कर्मचाऱ्यांचा वापर करण्यात येत होता. याप्रकरणी दोन्ही कर्मचाऱ्यांविरोधात गुन्हे दाखल करण्यात आले असून पुढील तपास सुरू आहे.