मुंबई: गोरेगाव येथील मुंबई पशुवैद्यकीय महाविद्यालयाच्या संकुलात आधुनिक अत्याधुनिक व बहुविध सेवांचे पशुवैद्यकीय रुग्णालयाची ५८.२२ कोटी रुपये खर्चून पुनर्बांधणी करण्याचा निर्णय घेण्यात आला आहे. यामुळे उपनगरीतील पाळीव आणि निसर्ग मुक्त पशूंसाठी उत्कृष्ट उपचार व सेवांची सुविधा उभारली जाईल असे उपनगर पालकमंत्री अशिष शेलार यांनी सांगितले.
उपनगर पालकमंत्री आशिष शेलार यांनी यासंदर्भात थेट मुख्यमंत्र्यांपर्यंत पाठपुरावा केला होता. त्यास फडणवीस यांनी सकारात्मक प्रतिसाद देत या रुग्णालयाच्या पुनर्बांधणीस मान्यता दिली आहे. नव्या इमारतीत तळमजला व तीन मजले असा आराखडा असून या रुग्णालयात लहान-मोठ्या प्राण्यांसाठी अत्याधुनिक व बहुविध सेवांचा समावेश आहे. उपनगरातील व मुंबईतील विविध भागातील प्राण्यांच्या उपचारासाठी येणाऱ्या नागरिकांना ही सुविधा मोलाची ठरणार आहे. या प्रकल्पात वास्तुविशारदांची मान्यता, सौरऊर्जा प्रणालीची उभारणी व पर्यावरणपूरक बाबींचा समावेश करण्यात आला आहे.
या निर्णयामुळे पशुप्रेमी, शेतकरी, रहिवासी व मुंबई महानगरातील अनेकांची जुनी मागणी पूर्ण होत आहे. नव्या मल्टीस्पेशालिटी पशुवैद्यकीय रुग्णालयामुळे प्राण्यांच्या आरोग्यसेवेतील दर्जा आणि उपलब्धता मोठ्या प्रमाणात वाढणार असल्याचे शेलार यांनी सांगितले.
