मुंबई: नाशिकमध्ये काँग्रेससह महाविकास आघाडी व मनसेच्या बैठकीत स्थानिक पातळीवर युती झाल्याचे जाहीर करण्यात आले. मात्र काँग्रेस प्रदेशाध्यक्ष हर्षवर्धन सपकाळ यांनी हे वृत्त फेटाळले आहे. स्थानिक स्वराज्य संस्थांच्या निवडणुकीत महाराष्ट्र नवनिर्माण सेनेबरोबर युती वा आघाडीसंदर्भात अद्याप कोणतीही चर्चा झालेली नाही. नाशिकमध्ये झालेल्या आजच्या बैठकीत काँग्रेसचे प्रतिनिधी म्हणून जे लोक गेले होते, त्यांना पक्षाने पाठवले नव्हते, त्यांच्या उपस्थितीशी पक्षाचा काहीही संबंध नाही, त्या लोकांना कारणे दाखवा नोटीस बजाविण्यात आली असल्याचे प्रदेशाध्यक्ष हर्षवर्धन सपकाळ यांनी सांगितले.
मुंबई महानगरपालिका निवडणुकीबाबत विचारलेल्या प्रश्नाला उत्तर देताना काँग्रेस प्रदेशाध्यक्ष हर्षवर्धन सपकाळ यांनी मुंबई महानगरपालिका निवडणूक स्वबळावर लढावी अशी अनेक नेते, पदाधिकारी व पक्ष कार्यकर्त्यांची भावना आहे, अशा भावना वेळोवेळी व्यक्त केलेल्या आहेत पण अद्याप मुंबई महानगरपालिकेची निवडणूक जाहीर झालेली नाही, निवडणूक जाहीर झाली की त्यासंदर्भातील निर्णय घेतला जाईल असे सांगितले.
३५ हजार इच्छुकांचे अर्ज
राज्यात नगरपालिका व नगरपंचायतीच्या निवडणुका जाहीर झाल्या असून आतापर्यंत ३५ हजार इच्छुक उमेदवारांचे अर्ज आलेले आहेत. या अर्जांची छाननी सुरु असून १२ तारखेला राज्य पार्लमेंटरी बोर्डाची बैठक होत आहे, या बैठकीत उमेदवारांसंदर्भात निर्णय घेतला जाईल, अशी माहिती सपकाळ यांनी दिली.
विभागनिहाय प्रभारींची नियुक्ती
स्थानिक स्वराज्य संस्था निवडणुकीच्या पार्श्वभूमीवर प्रदेश काँग्रेसने विभागनिहाय प्रभारींच्या नियुक्त्या जाहीर केल्या. त्यानुसार विधिमंडळ पक्षाचे नेते विजय वड्डेटीवार यांच्याकडे नागपूर, माजी राज्यमंत्री सतेज पाटील यांच्याकडे पश्चिम महाराष्ट्र, माजी मंत्री बाळासाहेब थोरात यांच्याकडे उत्तर महाराष्ट्र, अमरावती विभागाची जबाबदारी माजी मंत्री यशोमती ठाकूर, मराठवाड्याची जबाबदारी आमदार अमित देशमुख तर कोकण विभागाची जबाबादारी माजी मंत्री नसीम खान यांच्याकडे सोपविण्यात आल्याची माहिती पक्षाचे प्रदेश उपाध्यक्ष गणेश पाटील यांनी दिली.
