मुंबई– छठ पूजेहून परतणार्‍या दुचाकीला भरधाव वेगाने जाणार्‍या बसने धडक दिली. या अपघातात २५ वर्षीय तरुण दुचाकीस्वाराचा मृत्यू झाला तर मागे बसलेली त्याची बहिण जखमी झाली. जोगेश्वरी विक्रोळी जोड रस्त्यावर (जेव्हीएलआर) सोमवारी संध्यकाळी हा अपघात घडला. अपघातानंतर बसचालक पळून गेला असून पवई पोलीस फरार चालकाचा शोध घेत आहेत.
राहुल विश्वकर्मा (२५) हा तरूण विक्रोळी पूर्वेला राहतो. तो एका खासगी कुरियर कंपनीत काम करत होता.सोमवारी संध्याकाळी त्याचे कुटुंबिय मालाड येथे छठ पुजेसाठी गेले होते. संध्याकाळी कामावरून आल्यावर तो देखील छठ पुजेसाठी मालाडला गेल होता. संध्याकाळी तो बहिणीला घेऊन दुचाकीवरून घरी परतत होता. रात्री ८ च्या सुमारास जोगेश्वरी विक्रोळी जोड रस्त्यावरून (जेव्हीएलआर) परतत असताना भरधाव वेगाने जाणाऱ्या बसने त्याला धडक दिली. त्यामुळे तोल जाऊन राहुल आणि त्याची बहिण खाली पडले. राहुल बसच्या पुढील चाकाखाली आला आणि गंभीर जखमी झाला. अपघातानंतर बसचालक मदत न करता घटनास्थळावरून पळून गेला.
जखमी राहुलला उपचारासाठी घाटकोपरच्या राजावाडी रुग्णालयात दाखल करण्यात आले. तेथे उपचारादरम्यान रात्री त्याचा मृत्यू झाला. मयत राहुलच्या बहिणीने पळून जाणार्‍या बसचालकाचा क्रमांक टिपून घेतला होता. पवई पोलिसांनी बसचालकाविरोधात निष्काळजीपणे वाहन चालवून मृत्यूस कारणीभूत ठरल्याप्रकरणी गुन्हा दाखल केला आहे.
