आयआयएम’साठी पिंपरी-चिंचवडमध्ये ७० एकर जागा; मोशी भागात केंद्र उभारणार

देशात २१ भारतीय व्यवस्थापन संस्था (आयआयएम) कार्यरत आहेत. महाराष्ट्र हे एकमेव राज्य आहे जिथे मुंबई व नागपूर अशा दोन आयआयएम आहेत. आयआयएम नागपूरची शाखा सुरू होत आहे. गेले वर्षभर यासाठी पाठपुरावा सुरू होता. उद्योग नगरी, कामगार नगरी, माहिती तंत्रज्ञान केंद्र आणि ऑटो हब अशी ओळख असलेल्या पुणे जिल्ह्यात देशातील व्यवस्थापन क्षेत्राची उच्चतम संस्था प्रारंभ करण्याचा मुख्यमंत्री देवेंद्र फडणवीस यांचा मानस पूर्ण होत असल्याचे बावनकुळे म्हणाले. यासाठी पुणे, मुंबई व नागपूरमध्ये काही बैठकी घेण्यात आल्या. त्यानंतर मोशी येथील ७० एकर जागा देण्यास महसूलमंत्र्यांनी मंजुरी दिली. यासाठी भूसंपादनाच्या प्रक्रियेला सुरुवात झाली आहे. आयआयएम सारखी नामांकित संस्था सुरू करण्याच्या कार्याचा खऱ्या अर्थाने ‘‘श्रीगणेशा’’ झाला आहे. पिंपरी-चिंचवड हे औद्योगिक शहर असून येथे देशाच्या कानाकोपऱ्यातील नागरिक वास्तव्यास आहेत. मुंबई-पुणे कनेक्टिव्हीटी, औद्योगिक विकास आणि शैक्षणिक वातावरण लक्षात घेता आयआयएमसारखी संस्था सुरू होणे हे शहरासाठी अभिमानास्पद असल्याचे बावनकुळे म्हणाले.