मुंबई ‘आयआयटी’मधील आत्महत्येप्रकरणी चौकशी

आयआयटी, मुंबई संस्थेत प्रथम वर्ष अभियांत्रिकीचे (बी.टेक) शिक्षण घेणाऱ्या दर्शन सोळंकी याने रविवारी वसतिगृहाच्या सातव्या मजल्यावरून उडी मारून आत्महत्या केली. तो मूळचा अहमदाबाद येथील होता. आयआयटीत प्रवेश घेतल्यानंतर अवघ्या तीन महिन्यांतच त्याने जीवन संपवले. त्यामुळे संस्थेतील विद्यार्थ्यांमध्ये अस्वस्थता निर्माण झाली आहे. दर्शनच्या आत्महत्येस संस्थेतील वातावरणच कारणीभूत असल्याचा आरोप विद्यार्थ्यांनी केला आहे.

ग्रामीण भागातील अनेक विद्यार्थी कठोर परिश्रम करून आयआयटीत प्रवेश मिळवतात. त्यांना इंग्रजीतून संवाद साधण्याचा सराव नसतो. अनुसुचित जाती, गरीब कुटुंबातून आलेल्या विद्यार्थ्यांसाठी संस्थेतील वातावरण तणावपूर्ण ठरते. तसेच या विद्यार्थ्यांबरोबर भेदभावही केला जातो. त्यांना मदत करण्यात संस्था कमी पडते, असे आरोप विद्यार्थ्यांनी केले आहेत. दर्शनने जातीय भेदभावामुळे टोकाचे पाऊल उचलले की अभ्यासाचा ताण असह्य झाल्यामुळे हे नक्की माहीत नसले तरीही त्याची जबाबदारी संस्थेची आहे, असेही विद्यार्थ्यांचे म्हणणे आहे.

आयआयटी, मुंबईमध्ये अनिकेत अंभोरे या अनुसूचित जातीच्या विद्यार्थ्यांने २०१४मध्ये आत्महत्या केली. या घटनेनंतर विद्यार्थ्यांच्या दबावामुळे २०१७मध्ये एससी-एसीटी सेल सुरू करण्यात आला. परंतु या सेलचे काम २०२२मध्ये सुरू झाले, असे विद्यार्थ्यांनी सांगितले.

संस्थेचे म्हणणे..

विद्यार्थ्यांवरील ताण कमी करण्यासाठी, चांगल्या वातावरणासाठी संस्था सातत्याने प्रयत्न करते. विद्यार्थ्यांना आधार देण्यासाठी मार्गदर्शक नेमण्यात येतात. तरीही ही घटना रोखता आली नाही याबाबत आम्हाला खेद आहे. जे घडले ते दुर्दैवाने बदलता येणार नाही. मात्र भविष्यात असे काही घडू नये यासाठी सर्वतोपरी प्रयत्न करण्यात येत आहेत, असे संस्थेने स्पष्ट केले.

विद्यार्थ्यांचा आरोप..

ग्रामीण भागातील विद्यार्थी कठोर परिश्रम करून आयआयटीत प्रवेश मिळवतात. त्यांना इंग्रजीतून संवाद साधण्याचा सराव नसतो. अनुसुचित जाती, गरीब कुटुंबातून आलेल्या विद्यार्थ्यांसाठी संस्थेतील वातावरण तणावपूर्ण ठरते. विद्यार्थ्यांबरोबर भेदभावही केला जातो. त्यांना मदत करण्यात संस्था कमी पडते, असे आरोप विद्यार्थ्यांनी केले आहेत.