मुंबई : वैद्यकीय शिक्षण व संशोधन विभागाने केलेल्या चौकशीचा अहवाल तातडीने जाहीर करून विभागप्रमुखांची मंगळवारपर्यंत बदली करावी, अन्यथा ‘मार्ड’च्या माध्यमातून राज्यव्यापी आंदोलन पुकारण्यात येईल, असा इशारा जे.जे. रुग्णालयातील निवासी डॉक्टरांनी दिला आहे. विभागप्रमुख डॉ. बेला वर्मा यांना सक्तीच्या रजेवर पाठवण्यात आले आहे. मात्र त्यांची बदली करावी यावर आम्ही ठाम आहोत. तसेच रुग्णांना त्रास होऊ नये यासाठी आम्ही काळ्या फिती बांधून काम करीत असल्याचेही निवासी डॉक्टरांनी स्पष्ट केले.
जे. जे. रुग्णालयामधील बालरोग विभागातील एका महिला निवासी डॉक्टरने १६ जुलै रोजी आत्महत्येचा प्रयत्न केला होता. विभागप्रमुख निवासी डॉक्टरांचा मानसिक छळ करीत असल्यानेच हा निर्णय घेतल्याचा आरोप करीत या विभागातील निवासी डॉक्टरांनी काम बंद आंदोलन पुकारले होते. या आंदेलनाची दखल घेत वैद्यकीय शिक्षण व संशाेधन विभागाने, तसेच रुग्णालय प्रशासनाने स्वतंत्र चौकशी समिती स्थापन केली होती. या चौकशीदरम्यान रुग्णालयाने विभागप्रमुख डॉ. बेला वर्मा यांना सक्तीच्या रजेवर पाठवले होते. आमच्या मागण्या व अहवाल वैद्यकीय शिक्षण विभागाच्या सचिवांकडे पाठविण्यात आल्या आहेत. या अहवालावर निर्णय घेण्यासाठी दोन दिवसांचा कालावधी लागण्याची शक्यता आहे. मात्र शनिवार व रविवार आल्याने डॉक्टरांच्या बदलीसंदर्भातील निर्णय मंगळवारपर्यंत जाहीर करण्यात यावा, अशी मागणी निवासी डॉक्टरांकडून करण्यात येत आहे.
तसेच अहवाल सादर करण्यात आल्याने आणि रुग्णांची गैरसोय होऊ नये यासाठी आलटून पालटून काही डॉक्टर रुग्णसेवा व आंदोलनात सहभागी होत आहेत. विभागात काम करताना या घटनेचा निषेध म्हणून काळ्या फिती लावून काम करण्यात येत असल्याचे निवासी डॉक्टरांकडून सांगण्यात आले. मात्र वैद्यकीय शिक्षण विभागाने मंगळवारी निर्णय जाहीर केला नाही, तर ‘मार्ड’च्या माध्यमातून राज्यव्यापी आंदोलन पुकरण्यात येईल, असा इशाराही यावेळी त्यांनी दिला. जे.जे. रुग्णालयातील बालरोग विभागामधील महिला निवासी डॉक्टरने १६ जुलै रोजी आत्महत्या करण्याच्या प्रयत्न केला होता. त्यानंतर बालरोग विभागातील अन्य निवासी डॉक्टरांनी आंदोलन पुकारले आहे.
