दार बंद करण्यावरून झालेल्या वादातून इस्त्रीचे चटके, कायद्याच्या विद्यार्थिनीला अटकपूर्व जामीन मंजूर

त्यानंतर, याचिकाकर्तीने सत्र न्यायालयात धाव घेऊन अटकपूर्व जामिनाची मागणी केली होती. तथापि, याचिकाकर्तीने गुन्हा केल्याचे सकृतदर्शनी स्पष्ट होत असल्याचे निरीक्षण नोंदवून सत्र न्यायालयाने तिला अटकेपासून संरक्षण देण्यास नकार दिला. त्यामुळे, याचिकाकर्तीने उच्च न्यायालयात धाव घेतली होती व अटकपूर्व जामीन देण्याची मागणी केली होती.

न्यायमूर्ती श्याम चांडक यांच्या सुट्टीकालीन एकपीठाने याचिकाकर्तीला अटकेपासून संरक्षण दिले. तक्रारदार तरूणीला झालेल्या जखमा या गंभीर स्वरूपाच्या असल्याचे अद्याप वैद्यकीयदृष्ट्या प्रमाणित झालेले नाही. तपास अधिकाऱ्यांनीही वैद्यकीय अधिकाऱ्यांकडून त्याबाबतचे वैद्यकीय प्रमाणपत्र घेतलेले नाही, असे निरीक्षण न्यायालयाने याचिकाकर्तीला दिलासा देताना नोंदवले. तक्रारदार आणि याचिकाकर्तीमधील वाद हा किरकोळ मुद्यावरून झाला आहे. याचिकाकर्ती कायद्याची विद्यार्थिनी आहे आणि तिला कोणतीही गुन्हेगारी पार्श्वभूमी नाही. तिला अटक करून चौकशी करण्याची आवश्यकता नाही हे मुद्देही एकलपीठाने याचिकाकर्तीला दिलासा देताना प्रामुख्याने विचारात घेतले. याशिवाय, प्रकरणाचा तपास पूर्ण होण्याच्या मार्गावर आहे आणि दोन आठवड्यांत आरोपपत्र दाखल केले जाईल, असेही न्यायालयाने आदेशात नमूद केले.

..तर सुटका करावी

याचिकाकर्तीला अटक झाल्यास तिची ५०,००० रुपयांच्या वैयक्तिक मुचलक्यावर आणि एक किंवा दोन हमीदारांवर सुटका करण्याचे आदेशही न्यायालयाने दिले. त्याचवेळी, याचिकाकर्तीने तपासात सहकार्य करण्याचे आणि पुरावे नष्ट करण्याचा प्रयत्न न करण्याचे याचिकाकर्तीला दिलासा देताना बजावले.