मुंबई : मायानगरी अशी जगभरात ओळख असलेल्या मुंबईत आता दादासाहेब फाळके चित्रनगरीबरोबर आणखी एकाची भर पडेल. यासाठी राज्य सरकारच्या उद्योग विभागाकडून ही भव्य चित्रनगरी उभारण्यासाठी ‘प्राइम फोकस’ कंपनीशी ३००० कोटी रुपयांच्या सामंजस्य करारावर स्वाक्षऱ्या करण्यात आल्या. यातून अडीच हजार रोजगारनिर्मिती होईल अशी अपेक्षा आहे.
मुख्यमंत्री देवेंद्र फडणवीस यांच्या उपस्थितीत ‘वेव्ह्ज २०२५’ परिषदेमध्ये शुक्रवारी आठ हजार कोटी रुपये गुंतवणुकीचे सामंजस्य करार करण्यात आले. त्यात या महत्त्वपूर्ण कराराचा समावेश आहे. दोनशे एकरांवर या अत्याधुनिक चित्रनगरीची उभारणी केली जात आहे. त्यासाठी सरकारने दोन ते तीन जागांचे पर्याय दिल्याचे ‘प्राइम फोकस’चे मुख्य कार्यकारी अधिकारी नमित मल्होत्रा यांनी स्पष्ट केले.
यात जागतिक दर्जाचे तंत्रज्ञान वापरले जाईल. तसेच मनोरंजन पार्क व पर्यटकांना राहण्यासाठी सुविधा असेल. हा प्रकल्प २०२५-२६ मध्ये सुरू होईल. या करारावर राज्य शासनाच्या वतीने उद्याोग विभागाचे सचिव डॉ. पी. अनबलगन यांनी तर प्राइम फोकसच्या वतीने नमित मल्होत्रा यांनी स्वाक्षरी केली.
पनवेलमध्ये भव्य स्टुडिओ
पनवेलमध्ये भव्य स्टुडिओ उभारला जाईल. ‘गोदरेज’बरोबर पनवेल येथे एए स्टुडिओ स्थापन करण्यासाठी करार झाला. या कराराचा पहिला टप्पा ५०० कोटी रुपये गुंतवणुकीचा असून याद्वारे (प्रत्यक्ष आणि अप्रत्यक्ष) ६०० रोजगारनिर्मिती होईल. हा प्रकल्प २०२७ मध्ये सुरू होईल. पुढील टप्प्यात १५०० कोटी रुपयांची गुंतवणूक अपेक्षित असून यामध्ये १९०० रोजगारनिर्मिती होईल तर हा टप्पा २०३० पर्यंत सुरू होईल. या माध्यमातून एकूण २००० कोटी रुपयांची गुंतवणूक तर २५०० रोजगारनिर्मिती होईल. याबाबतच्या करारावर गोदरेजच्या वतीने महाव्यवस्थापक हरसिमरण सिंग यांनी स्वाक्षरी केली.
एनएसईकडून ‘निफ्टी वेव्हज’ निर्देशांक
मुंबई : राष्ट्रीय शेअर बाजार अर्थात एनएसईने शुक्रवारी ‘निफ्टी वेव्हज’ निर्देशांक सादर करीत असल्याची घोषणा केली. माध्यम, मनोरंजन आणि ‘गेमिंग’ उद्याोगाशी संबंधित ४३ सूचिबद्ध कंपन्यांचा समावेश असलेला हा निर्देशांक या क्षेत्राच्या कामगिरीचे मापन प्रस्तुत करेल. देशातील सर्वात गतिमान उद्याोगांपैकी एक असलेल्या क्षेत्रांच्या कामगिरीची सखोल माहिती देण्यासाठी हा नवीन निर्देशांक तयार करण्यात आला आहे.
