मुंबई : राज्य परिवहन (एसटी) महामंडळाने प्रवाशांच्या सोयीसाठी आणि इ-बस सेवेला अधिक प्रतिसाद मिळवा यासाठी एक महत्त्वपूर्ण निर्णय घेतला आहे. आता राज्यातील इ-बस प्रवाशांना मासिक व त्रैमासिक पास सवलत योजना उपलब्ध होणार आहे, अशी घोषणा परिवहन मंत्री तथा एसटी महामंडळाचे अध्यक्ष प्रताप सरनाईक यांनी केली.
मंत्री सरनाईक म्हणाले की, नोकरी व व्यवसायाच्या निमित्ताने दररोज एकाच मार्गावर नियमित प्रवास करणाऱ्या प्रवाशांना इ-बस सेवेकडे आकर्षित करणे हा या पास योजनांचा मुख्य उद्देश आहे. सध्या महामंडळाच्या ताफ्यात इ-बस प्रकल्पातील ४४८ बस आणि शिवाई प्रकल्पातील ५० इ-बस कार्यरत आहेत. भविष्यात या बसची संख्या आणखी वाढवण्याचा मानस आहे. अनेक प्रवाशांकडून इ-बस सेवेत पास प्रणालीची मागणी केली जात होती. या पार्श्वभूमीवर महामंडळाने प्रवाशांना अधिक सोयीस्कर आणि आर्थिकदृष्ट्या परवडणारा प्रवास देण्यासाठी ही योजना लागू करण्याचा निर्णय घेतला आहे. या निर्णयामुळे दैनंदिन प्रवाशांना मोठा दिलासा मिळणार असून, स्वच्छ, पर्यावरणपूरक आणि आरामदायी प्रवासासाठी इ-बसचा वापर वाढण्यास मदत होईल, असा विश्वास सरनाईक यांनी व्यक्त केला.
पास योजनेची प्रमुख वैशिष्ट्ये
- उपलब्धता – ९ मीटर इ-बस, १२ मीटर इ-बस आणि इ-शिवाई सेवेमध्ये हे पास उपलब्ध असतील. (इ-शिवनेरी बससेवा वगळून)
- मासिक पास – २० दिवसांच्या परतीच्या प्रवासाचे भाडे आकारून ३० दिवसांसाठी पास दिला जाईल.
- त्रैमासिक पास – ६० दिवसांच्या परतीच्या प्रवासाचे भाडे आकारून ९० दिवसांचा पास उपलब्ध होईल.
- सेवा वर्गातील लवचिकता – उच्च सेवा वर्गाचा पास (इ-बस) वापरून प्रवासी निमआराम किंवा साध्या बसमध्येही प्रवास करू शकतील.
- फरक भाडे नियम – निमआराम किंवा साध्या बसच्या पासधारकांना इ-बसने प्रवास करायचा असल्यास, दोन्ही सेवांमधील भाड्यातील फरक १०० टक्के दराने भरून तिकीट घेऊन प्रवास करता येईल.
