खडकपाडा योजनेतील १३३ विजेत्यांना वर्षभरापासून घराची प्रतीक्षा…

मुंबई मंडळाने आॅक्टोबर २०२४ मध्ये मुंबईतील विविध ठिकाणच्या २०३० घरांसाठी सोडत काढली होती. सोडतीतील घरांची संख्या वाढविण्यासाठी मुंबई मंडळाने चालू बांधकाम प्रकल्पातील घरांचाही सोडतीत समावेश केला होता. त्यामुळे या सोडतीत मोठ्या संख्येने चालू बांधकाम प्रकल्पातील घरे होती. पवई, पहाडी, दादर, मालाड, सांताक्रूझ यासह अन्य ठिकाणची घरे होती.

त्यातील पवई, पहाडीसह अन्य काही ठिकाणची घरे पूर्ण होऊन विजेत्यांना घरांचा ताबा मिळाला आहे. मात्र दिंडोशी, खडकपाडा येथील १३३ विजेत्यांना अद्यापही घराचा ताबा मिळालेला नाही. आॅक्टोबर २०२४ च्या सोडतीत संकेत क्रमाक ४७९ योजनेअंतर्गत खडकपाडा येथील अल्प उत्पन्न गटातील ८७ घरांचा समावेश होता. ४३.३९ चौ. मीटर क्षेत्राच्या त्या घरांची किंमत ६४ लाख १२ हजार ५८४ रुपये अशी होती.

खडकपाडा येथीलच संकेत क्रमांक ४८० मध्ये अल्प उत्पन्न गटातील ४६ घरांचा समावेश होता. त्यातील ५९.५६ चौ. मीटर क्षेत्राच्या घरांची विक्री किंमत ८६ लाख ११ हजार ९२४ रुपये अशी होती. घरांच्या सोडतीवेळी खडकपाड्यातील घरांचा ताबा लवकरात लवकर दिला जाईल असे सांगण्यात आले होते. मात्र आता सोडतीला एक वर्ष होऊन गेले तरी विजेत्यांना घराचा ताबा मिळालेला नाही.

आॅक्टोबर २०२४ मध्ये मला खडकपाडा येथे घर लागले आहे. पण अद्याप घराचा ताबा मिळालेला नाही. घराची गरज लक्षात घेता नुकत्याच काढण्यात आलेल्या कोकण मंडळाच्या सोडतीतही मी अर्ज भरले होते. दोन ठिकाणी मला घर लागलेही. मात्र मुंबईतील घराचे महत्त्व लक्षात घेता मी खडकपाड्यातीलच घर घेण्याचे ठरवून कोकण मंडळातील दोन्ही घरे परत केली आहेत. पण खडकपाड्याच्या घराचा ताबा कधी मिळणार, किती दिवस आणखी वाट पाहायची हा प्रश्न माझ्यासमोर आहे.

म्हाडा अधिकार्‍यांकडे विचारणा केल्यास लवकरच ताबा देऊ इतकेच सांगितले जाते, असे एका विजेत्याने सांगितले. याबाबत संबंधित अधिकार्‍यांना विचारले असता, घरांचे काम पूर्ण झाले असून अग्निशमन दलाचे ना हरकत प्रमाणपत्रही मिळाले आहे. आता निवासी दाखल्याची प्रक्रिया सुरु करण्यात आली आहे. येत्या १०-१२ दिवसात निवासी दाखला मिळेल आणि घराचा ताबा दिला जाईल असे त्यांनी सांगितले.