ठाण्यातील शिवाजीनगर येथील मनसे पदाधिकारी असलेल्या विजय भोसले यांच्यावर गुरुवारी पहाटे तीन वाजता चौघांनी हल्ला केला. मंडपात उभे असताना चार जणांनी येऊन भोसले यांच्यावर हल्ला केला. यामध्ये भोसले गंभीर जखमी झाले असून त्यांच्यावर ठाणे सिव्हिल हॉस्पिटलमध्ये उपचार सुरू आहेत. या प्रकरणी श्रीनगर पोलिसात मारहाणीचा गुन्हा दाखल झाला आहे. सचिन सावंत, मंगेश वाघ, कुलदिप जाधव आणि हेमंत सावंत यांच्या विरोधात पोलिसांनी गुन्हा दाखल केला असून या प्रकरणी अजून कोणालाही अटक करण्यात आलेले नाही. आरोपींचे सहकारी भोसले यांच्यासोबत काम करत असल्याने संतप्त झालेल्या आरोपींनी त्यांच्यावर हल्ला केल्याचे पोलिसांनी सांगितले.