मुंबई : मुंबईत यंदा जुलै महिन्यात समाधानकारक पाऊस पडलेला नाही. हवामान विभागाच्या आकडेवारीनुसार, १ ते ३१ जुलैदरम्यान कुलाबा केंद्रात ३७८.४ मिमी, तर सांताक्रूझ केंद्रात ७९०.६ मिमी पावसाती नोंद झाली. गतवर्षीच्या तुलनेत जुलैमधील पावसात लक्षणीय घट झाली. मागील वर्षीच्या तुलनेत यंदा जुलैमध्ये कुलाबा केंद्रात तब्बल ३५५.७ मिमी आणि सांताक्रूझ केंद्रात ६५.१ मिमी कमी पाऊस नोंदला गेला आहे.
यंदा मोसमी पाऊस मुंबईत लवकर दाखल झाला. मात्र पाऊस पडण्याचे प्रमाण कमी होते. जून महिन्यातही फारसा पाऊस पडलेला नाही. महिनाअखेरीस पडलेल्या पावसामुळे सरासरीइतका पाऊस नोंदला गेला. जुलैमध्येही जून महिन्यासारखीच परिस्थिती होती. जुलै महिन्याच्या सुरुवातीचे १५ दिवस पाऊस पडलेलाच नाही. अधूनमधून हलक्या सरी बरसल्या मात्र, मुसळधार पाऊस या कालावधीत पडलेला नाही. त्यानंतर साधारण २० तारेखपासून मुंबईत पाऊस सक्रिय झाला होता. या कालावधीत मुंबईत मुसळधार पाऊस कोसळला.
हवामान विभागाच्या सांताक्रूझ केंद्रात सलग दोन दिवस १०० मिमी पावसाची नोंद झाली. या पावसामुळे सांताक्रूझ येथील आकडेवारीत वाढ झाली. मात्र, कुलाबा येथे फारशी पावसाची नोंद झालेली नाही. दरम्यान, जुलै महिन्यात कुलाबा केंद्रात साधारण ७३४.१ मिमी, तर सांताक्रूझ केंद्रात ८५५.७ मिमी पाऊस पडणे अपेक्षित असते. यंदा हवामान विभागाच्या कुलाबा केंद्रात १ ते ३१ जुलैपर्यंत ३७८.४ मिमी, तर सांताक्रूझ केंद्रात ७९०.६ मिमी पावसाती नोंद झाली. गतवर्षी जुलै महिन्यात दोन्ही केंद्रात सरासरीपेक्षा अधिक पावसाची नोंद झाली होती. हवामान विभागाच्या कुलाबा केंद्रात जुलै २०२४ मध्ये १४०१.८ मिमी, तर सांताक्रूझ केंद्रात १७०२.८ मिमी पाऊस नोंदला गेला होता. याआधी २००२ मध्ये जुलै महिन्यात सर्वाधिक कमी पावसाची नोंद झाली होती. हवामान विभागाच्या कुलाबा केंद्रात जुलै २००२ मध्ये १०३.५ मिमी, तर सांताक्रूझ केंद्रात १०२.८ मिमी पावसाची नोंद झाली होती.
ऑगस्टमध्ये सामान्य पाऊस
हवामान विभागाने वर्तवलेल्या सुधारित अंदाजानुसार, ऑगस्ट महिन्यात मुंबईत सामान्य पाऊस पडण्याची शक्यता आहे. ऑगस्ट महिन्याचे सुरुवातीचे दोन आठवडे फारसा पाऊस नसेल. त्यानंतर पावसाचा जोर वाढेल, असा अंदाज हवामान विभागाने व्यक्त केला आहे.
मे महिन्यातच सर्वाधिक
यंदा मे महिन्यातच मुंबईत पावसाने दमदार हजेरी लावली होती. मुंबईत १ ते ३१ मे या कालावधीत ८८१.६ मिमी पावसाची नोंद झाली. यंदा हवामानातील बदलांमुळे मुंबई आणि उपनगरांमध्ये मे महिन्यात नेहमीपेक्षा जास्त पडलेला वळवाचा पाऊस आणि त्यानंतर लवकरच दाखल झालेला मोसमी पाऊस यामुळे संपूर्ण मे महिन्यात ८८१.६ मिमी पावसाची नोंद झाली. मेमध्ये हवामान विभागाच्या कुलाबा केंद्रात ५०३.२ मिमी, तर सांताक्रूझ केंद्रा ३७८.४ मिमी पावसाची नोंद झाली होती. तब्बल १०७ वर्षांनी यंदा मे महिन्यात सर्वाधिक पावसाची नोंद झाली आहे.
