डबेवाल्यांना २५ लाखांत ५०० चौरस फुटांचे घर; मुख्यमंत्री देवेंद्र फडणवीस यांची घोषणा

मुंबईतील डबेवाल्यांना ५०० चौरस फुटांचे घर केवळ २५.५० लाख रुपयांत उपलब्ध करून देण्याची घोषणा मुख्यमंत्री देवेंद्र फडणवीस यांनी गुरुवारी केली.

500 square feet house for Dabbawalas at Rs 25 lakh; Chief Minister Devendra Fadnavis' announcement

डबेवाल्यांना २५ लाखांत ५०० चौरस फुटांचे घर; मुख्यमंत्री देवेंद्र फडणवीस यांची घोषणा (संग्रहित छायाचित्र)

मुंबई : मुंबईतील डबेवाल्यांना ५०० चौरस फुटांचे घर केवळ २५.५० लाख रुपयांत उपलब्ध करून देण्याची घोषणा मुख्यमंत्री देवेंद्र फडणवीस यांनी गुरुवारी केली. पंतप्रधान आवास योजना आणि इतर शासकीय योजनांच्या माध्यमातून हा परवडणारा गृहनिर्माण प्रकल्प राबविण्यात येणार असल्याचे त्यांनी सांगितले. वांद्रे पश्चिम येथे डबेवाला आंतरराष्ट्रीय अनुभव केंद्राच्या उद्घाटनप्रसंगी फडणवीस बोलत होते.

गेल्या १३५ वर्षांच्या प्रवासात आमचे डबेवाले संगणक किंवा ‘आर्टिफिशियल इंटेलिजन्स’ न वापरता मानवी बुद्धिमत्तेच्या जोरावर जगप्रसिद्ध व्यवस्थापन कौशल्य दाखवत आहेत. एकही चूक न करता, एकही दिवस उशीर न करता त्यांनी काम केले. ही जगातली अद्वितीय परंपरा आहे. ‘डबेवाला भवन’चे रूपांतर आंतरराष्ट्रीय अनुभव केंद्रात झाल्यामुळे आणि येथे ‘व्हर्च्युअल रिॲलिटी’च्या माध्यमातून सकाळच्या भजनापासून लोकल प्रवास, डबे वितरित करणे आणि जेवणापर्यंत असा डबेवाला संस्कृतीचा थेट अनुभव घेता येत असल्याचे सांगत मुख्यमंत्र्यांनी डबेवाल्यांचे कौतूक केले. डबेवाला समाजाची निर्व्यसनी, वारकरी परंपरेवर आधारित सेवा ही जगभरासाठी प्रेरणादायी असल्याचे फडणवीस म्हणाले.

पुढील काळात या केंद्रासाठी अधिक चांगल्या सुविधा आणि उपलब्ध करून देणार असल्याची घोषणाही मुख्यमंत्र्यांनी या वेळी केली. या प्रसंगी सांस्कृतिक कार्यमंत्री आशीष शेलार, आमदार श्रीकांत भारतीय, योगेश सागर, तमिळ सेल्वन यांच्यासह ‘नूतन मुंबई टिफिन बॉक्स सप्लायर चॅरिटी ट्रस्ट’चे अध्यक्ष उल्हास मुके, ‘मुंबई टिफिन बॉक्स सप्लायर असोसिएशन’चे अध्यक्ष रामदास करवंदे, सचिव किरण गवांदे आदी या वेळी उपस्थित होते.

फडणवीस यांनी यावेळी डबेवाल्यांच्या गृहनिर्माण प्रकल्पासाठी जमीन उपलब्ध करून देणारे त्रिपाठी यांचे, तसेच नफा न घेता उत्कृष्ट दर्जाचे बांधकाम करण्याची जबाबदारी स्वीकारणारे जयेश शाह आणि संपूर्ण टीमचे विशेष कौतुक केले. सर्व प्रक्रिया पारदर्शकपणे पूर्ण करून आज या करारावर स्वाक्षऱ्या करण्यात आल्याची माहिती त्यांनी या वेळी दिली.

डबेवाल्यांच्या कार्याचा गौरव करताना आशिष शेलार यांनी विठ्ठलाचे नाव घेत लोकांच्या पोटापाण्याची सेवा करणाऱ्या मुंबईच्या डबेवाल्यांचे आंतरराष्ट्रीय अनुभव केंद्र उभे राहणे हा मुंबईकरांसाठी अभिमानाचा क्षण असल्याचे सांगितले. हे केंद्र जगभरातील पर्यटकांना प्रेरणा आणि व्यवस्थापनाचे धडे देणारे केंद्र ठरुन मुंबईची ओळख द्विगुणित करेल, असा विश्वास त्यांनी व्यक्त केला. तर श्रीकांत भारतीय यांनी जगातली २७ विद्यापीठे संशोधन करीत असलेल्या डबेवाल्यांच्या संस्कृतीची माहिती देणाऱ्या आंतरराष्ट्रीय केंद्रामध्ये आधुनिक तंत्रज्ञानाचा वापर करण्यात येत असल्याचे सांगून त्यांची पुढची पिढीच या केंद्राचे संचालन करणार असल्याची माहिती दिली.