मुंबई : घराबाहेर खेळणाऱ्या नऊ वर्षांच्या मुलावर लैंगिक अत्याचार करण्यात आल्याचा प्रकार उघडकीस आला आहे. याप्रकरणी आरसीएफ पोलिसांनी बालकांचे लैंगिक अत्याचारापासून संरक्षण कायद्याअंतर्गत (पोक्सो) गुन्हा दाखल केला आहे. याप्रकरणी १६ वर्षीय विधीसंघर्षग्रस्त मुलाची डोंगरी सुधारगृहात रवानगी करण्यात आली आहे.
पीडित मुलगा शालेय विद्यार्थी असून सध्या सुटी असल्यामुळे घरीच होता. पीडित मुलगा सोमवारी रात्री घराशेजारी खेळत असताना आरोपीने त्याला घरी बोलावले. त्यानंतर बोलण्यात गुंतवणूक आरोपी मुलाने पीडित मुलावर लैंगिक अत्याचार केला. या प्रकारामुळे तो घाबरला होता. आरोपीने त्याला हा प्रकार कोणालाही न सांगण्याबद्दल धमकावले होते. पण मुलाने धाडस करून हा प्रकार कुटुंबियांना सांगितला. त्यानंतर पीडित मुलाच्या कुटुंबियांनी याबाबतची तक्रार पोलिसांकडे केली. पोलिसांनी तक्रारीनंतर याप्रकरणी तात्काळ लैंगिक अत्याचार व पोक्सो कायद्या अंतर्गत गुन्हा दाखल केला. त्यानंतर विधिसंघर्षग्रस्त मुलाची रवानगी डोंगरी बालसुधारगृहात करण्यात आली आहे. घाटकोपर येथील राजावाडी रुग्णालयात मुलाची वैद्यकीय तपासणी करण्यात आली आहे. याप्रकरणी आरसीएफ पोलीस अधिक तपास करत आहेत
अल्पवयीन मुलांविरोधातील गुन्ह्यांमध्ये वाढ
मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्याअंतर्गत १३४१ गुन्ह्यांची नोंद झाली होती. २०२३ पोक्सो कायद्याअंतर्गत ११०८ गुन्ह्यांची नोंद झाली होती. मुंबईत २०२४ मध्ये पोक्सो कायद्याअंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे. २०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांच्या उकल होण्याचे प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधातील अत्याचाराच्या घडनांमध्ये बहुसंख्य आरोपी परिचित व्यक्त आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होते.
