मुंबईः लहान मुलीवर अत्याचार केल्याप्रकरणी पोलिसांनी ६० वर्षीय व्यक्तीला अटक केली. आरोपी पीडित मुलीचा काका आहे. याप्रकरणी पोलिसांनी बलात्कार व बालकांचे लैंगिक अत्याचारापासून संरक्षण (पोक्सो) कायद्याअंतर्गत गुन्हा दाखल केला आहे. याप्रकरणी अधिक तपास सुरू असल्याचे पोलिसांनी सांगितले.
पीडित मुलगी झोपली असताना आरोपीने तिच्यावर लैंगिक अत्याचार केल्याचा आरोप आहे. घटनेनंतर पीडित मुलीला शीव येथील लोकमान्य टिळक रुग्णालयात दाखल करण्यात आले. त्यानंतर याप्रकरणी पोलिसांकडे तक्रार करण्यात आली असून पोलिसंनी बलात्कार व पोक्सो कायद्याअंतर्गत गुन्हा दाखल केला. त्यानंतर पोलिसांनी पथक पाठवून आरोपी राहत असलेल्या घरातून त्याला अटक केली. गुन्हा दाखल झाल्यानंतर काही तासांतच आरोपीला अटक करण्यात आल्याचे पोलिसांनी सांगितले. याप्रकरणी पोलीस अधिक तपास करीत आहेत.
अल्पवयीन मुलांसंदर्भातील गुन्ह्यांमध्ये वाढ
मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्याअंतर्गत १३४१ गुन्ह्यांची नोंद झाली होती. २०२३ पोक्सो कायद्याअंतर्गत ११०८ गुन्ह्यांची नोंद झाली होती. मुंबईत २०२४ मध्ये पोक्सो कायद्याअंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे.
२०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांची उकल होण्याचे प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधातील अत्याचाराच्या घटनांमध्ये बहुसंख्य आरोपी परिचित व्यक्ती आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले आहे.
