मुंबई महापालिका बँक निवडणुकीचा निकाल

मुंबई महापालिकेच्या कर्मचाऱ्याची बॅंक असलेल्या ‘दि म्युनिसिपल को-ऑपरेटिव्ह बँक लिमिटेड या बॅंकेची पंचवार्षिक निवडणूक गुरुवारी २१ ऑगस्टला पार पडली.

महापालिका बँक निवडणुकीचा निकाल शनिवारी पहाटे; आमदार प्रवीण दरेकर यांच्या निकटवर्तीयांच्या पॅनेलला विजयाची संधी, बच्चू कडू यांचे पॅनेल पराभवाच्या छायेत (संग्रहीत छायाचित्र)

मुंबई : बेस्टच्या पतपेढीच्या निवडणुकीनंतर गुरुवारी मुंबई महापालिकेच्या कर्मचाऱ्यांच्या बॅंंकेची निवडणूक पार पडली असून शुक्रवारी या निवडणुकीची मतमोजणी रात्री उशीरापर्यंत सुरू होती. शनिवारी पहाटे या मतमोजणीचा निकाल लागण्याची शक्यता आहे. या निवडणुकीत सहा पॅनेल रिंगणात होते. परंतु, विद्यमान संचालक मंडळाने तयार केलेल्या दोन पॅनेलमध्येच प्रमुख लढत होती. त्यापैकी सहकार पॅनेलचे प्रमुख आमदार प्रवीण दरेकर यांचे निकटवर्तीय आहेत. मतमोजणीत याच पॅनेलची सरशी होती.

मुंबई महापालिकेच्या कर्मचाऱ्याची बॅंक असलेल्या ‘दि म्युनिसिपल को-ऑपरेटिव्ह बँक लिमिटेड या बॅंकेची पंचवार्षिक निवडणूक गुरुवारी २१ ऑगस्टला पार पडली. या निवडणुकीसाठी मुंबई महापालिका कामगार व कर्मचारी वर्तुळातील वातावरण गेल्या काही दिवसांपासून तापले होते. बेस्टच्या पतपेढीच्या निवडणुकीनंतर या निवडणुकीलाही महत्त्व आले आहे. तब्बल ६० हजाराहून अधिक सभासद असलेल्या या बॅंकेच्या निवडणुकीला यंदा कामगारांसह अधिकारी वर्गाने चांगला प्रतिसाद दिला. एकूण ४८ टक्के मतदान झाले होते.

यंदाच्या निवडणुकीत प्रहार जनशक्ती पक्षाचे अध्यक्ष, माजी राज्यमंत्री बच्चू कडू यांचेही पॅनेल उतरले आहे. तर विद्यामान संचालक मंडळाच्या जय सहकार पॅनेलचे प्रमुख उमेदवार विष्णू घुमरे हे आमदार प्रवीण दरेकर यांचे निकटवर्तीय असल्याचे बोलले जात आहे. तर सुप्रसिद्ध वकील गुणरत्न सदावर्ते यांच्या पॅनेलने निवडणुकीआधीच माघार घेतली होती. सदावर्ते यांच्या पॅनेलमधील चार उमेदवारांनी घुमरे यांच्या पॅनेलमधून निवडणूक लढवली आहे.

हेही वाचा

‘लोकसत्ता इकोफ्रेंडली घरगुती गणेशोत्सव’ स्पर्धेचा लोकार्पण सोहळा येत्या सोमवारी

कॉटनग्रीन येथे शुक्रवारी सकाळी मतमोजणीला सुरूवात झाली. मात्र रात्री उशीरापर्यंत ही मतमोजणी सुरू होती. या निवडणुकीसाठी विष्णू घुमरे यांचे जय सहकार पॅनेल, भानुदार भोईर यांचे सहकार पॅनेल, बच्चू कडू यांचे जय महाराष्ट्र सहकार पॅनेल, समता पॅनेल, स्वराज्य पॅनेल आणि बीएमसी सहकार पॅनेल अशी सहा पॅनेल होती. मात्र मतमोजणीत बच्चू कडू यांचे पॅनेल मागे पडल्याचे चित्र होते. तर घुमरे याणि भोईर यांच्या पॅनेलमध्येच प्रमुख लढत सुरू असल्याचे चित्र होते.

साडेपाच हजार कोटींची उलाढाल

मुंबई महापालिकेच्या कर्मचाऱ्यांच्या बॅंकेची तब्बल साडेचार हजार कोटींची उलाढाल आहे. या बॅंकेच्या तब्बल २२ शाखा आहेत. ६० हजारांहून अधिक सभासद आहेत. मुंबई महापालिकेचे आयुक्त हे या बँकेचे पदसिद्ध अध्यक्ष असतात. तर अतिरिक्त आयुक्त पदसिद्ध उपाध्यक्ष असतात. तसेच दोन उपायुक्त बॅंकेचे कार्याध्यक्ष व उप कार्याध्यक्ष असतात. त्या खालोखाल बॅंकेचे १९ सदस्यांचे संचालक मंडळ असते. या १९ सदस्यांच्या संचालक मंडळासाठी पंचवार्षिक निवडणूक होते. संपूर्ण मुंबईतील पालिकेची सर्व कार्यालये पालथी घालून या निवडणुकीचा प्रचार केला जातो. तसेच मुंबई बाहेर असलेल्या धरणक्षेत्रात काम करणाऱ्या पालिकेच्या कर्मचाऱ्यांपर्यंतही उमेदवार पोहोचतात.