चार दिवसांत मुंबईतील रस्त्यांवर साचलेल्या दीड हजार कोटी लिटर पाण्याचा उपसा; पाच उदंचन केंद्रातील पंप ७६१ तास कार्यरत

मुंबईला चारही बाजूनी समुद्राने वेढले आहे. त्यामुळे अतिवृष्टीच्या काळात समुद्राला भरती येते तेव्हा पावसाच्या पाण्याचा निचरा होत नाही. त्यावेळी पावसाच्या पाण्याचा वेगाने निचरा करण्यासाठी मुंबई महापालिकेने मुंबईत सहा ठिकाणी भव्य अशी उदंचन केंद्रे (पंपिंग स्टेशन) तयार केली आहेत. हाजीअली, लव्हग्रोव्ह (वरळी), क्लीव्हलँड बंदर (वरळी गाव), ब्रिटानिया (रे रोड), ईर्ला (जुहू) आणि गजदरबंध (सांताक्रूज) अशा सहा ठिकाणी उदंचन केंद्र आहेत.

समुद्र किंवा खाडीजवळ असलेल्या या उदंचन केंद्रात अवाढव्य असे एकूण ४३ पंप आहेत. प्रत्येक पंपाची क्षमता प्रति सेकंदाला ६,००० लिटर पाण्याचा उपसा करण्याची आहे. या सर्व पंपांची एकत्रित क्षमता प्रत्येक सेंकदाला २ लाख ५८ हजार लिटर एवढ्या पाण्याचा उपासा करण्याची आहे. गेल्या चार दिवसांपासून मुंबईत पडलेल्या पावसामुळे रस्त्यांवर साचलेले पर्जन्य जलवाहिन्यांमधून या उदंचन केंद्रापर्यंत पोहोचले. उदंचन केंद्राद्वारे या पाण्याचा उपसा करण्यात आला.

गेल्या चार दिवसांच्या कालावधीत सर्व उदंचन केंद्रामधून तब्बल १६,४५१.५५ दशलक्ष लिटर (१,६४५.१५५ कोटी लिटर) एवढ्या पाण्याचा उपसा करण्यात आला. तुलनात्मक विचार केल्यास ८,०४.६ कोटी लिटर एवढी जलधारण क्षमता असणाऱ्या तुळशी तलावातील पाण्याच्या दुपटीपेक्षा अधिक पाण्याचा उपसा गेल्या चार दिवसांत करण्यात आला. या कालावधीदरम्यान सर्व पंप एकूण ७६१ तास व ३८ मिनिटे कार्यरत होते.

दरम्यान, पावसाच्या पाण्याचा सर्वाधिक उपसा इर्ला उदंचन केंद्राद्वारे करण्यात आला. या केंद्राद्वारे ३,७६८.४८ दशलक्ष लिटर एवढ्या पाण्याचा उपसा करण्यात आला. या खालोखाल क्लिव्हलॅंड बंदर उदंचन केंद्र, गजधरबंध उदंचन केंद्र, लवग्रोव्ह उदंचन केंद्र, हाजी अली उदंचन केंद्र आणि ब्रिटानिया उदंचन केंद्रातून पाण्याचा उपसा करण्यात आला.

किती पाण्याचा उपसा

उदंचन केंद्राचे नाव – पाणी उपसा

ईर्ला – ३,७६८.४८

क्लीव्हलँड बंदर – २,९०६.०२

गजदरबंध – २,८७०.११

लव्हग्रोव्ह – २,८२६.५०

हाजी अली – २,३७९.७८

ब्रिटानिया – १,७००.६

एकूण – १६,४५१.५५