दक्षिण मध्य मुंबई : धारावी, वडाळा वगळता इतर मतदारसंघांत विरोधी कौल

काही महिन्यांपूर्वी लोकसभा निवडणुकांमध्ये महाविकास आघाडीचा खासदार निवडून देणाऱ्या दक्षिण मध्य मुंबईत वडाळा, धारावी वगळता इतर मतदारसंघांमध्ये मताधिक्याबाबत उलटफेर पहायला मिळाले. माहीम, चेंबूर, अणुशक्ती नगर, शीव कोळीवाडा विधानसभा मतदारसंघांमध्ये लोकसभा निवडणुकीतील मतदानाच्या विरुद्ध कौल जनतेने दिला. दुसरीकडे वडाळा विधानसभा मतदारसंघांतून नऊ वेळा निवडून येऊन भाजपच्या कालिदास कोळंबकर यांनी नवा विक्रम केला, तर धारावीची जागा गायकवाड कुटुंबियांना राखण्यात यश आले आहे.

हेही वाचा…मुख्यमंत्रीपदावरून पेच; शिंदेंची मनधरणी करण्याचा प्रयत्न? शपथविधीचा मुहूर्त लांबणीवर पडण्याची शक्यता

मनसे अध्यक्ष राज ठाकरे यांचे पुत्र अमित ठाकरे विधानसभा निवडणुकीच्या रिंगणात उतरल्यामुळे माहीम मतदारसंघाकडे संपूर्ण राज्याचे लक्ष केंद्रीत झाले होते. त्यातच भाजपच्या स्थानिक कार्यकर्त्यांकडूनही मदतीचे आश्वासन अमित ठाकरेबाबत मिळाली होते. त्याशिवाय तीन वेळा माहीममधून निवडणूक जिंकलेले शिवसेनेचे (एकनाथ शिंदे) मातब्बर नेते सदा सरवणकर रिंगणात होते. विशेष म्हणजे लोकसभा निडणुकीत या मतदारसंघात महायुतीला १३ हजार ९९० मताधिक्य मिळाले होते. पण विधानसभा निवडणुकीत स्थानिक पातळीवर सक्रिय असलेले व दांडगा जनसंपर्क असलेले शिवसेनेच्या (उद्धव ठाकरे) महेश सावंत यांनी दोन्ही मोठ्या बड्या उमेदवारांना धूळ चारली. ते १३१६ मतांनी निवडून आले. मनसे व शिंदे गटात मतविभाजन झाल्याचाही फटका शिवसेनेला (एकनाथ शिंदे) बसल्याचा आरोपही स्थानिक कार्यकर्त्यांकडून केला जात आहे.

चेंबूर विधानसभा मतदारसंघात महाविकास आघाडीचे उमेदवार अनिल देसाई यांना लोकसभा निवडणुकीत तीन हजारांचे मताधिक्य मिळाले होते. त्यामुळे हा मतदारसंघ महाविकास आघाडीचे उमेदवार प्रकाश फातर्पेकर यांच्यासाठी अनुकूल मानला जात होता. पण महायुतीमधील घटकपक्ष शिवसेनेचे (एकनाथ शिंदे) माजी आमदार आणि उमेदवार तुकाराम काते यांनी तब्बल १० हजार ७११ मतांनी त्यांचा पराभव केला. भाजपसोबत युतीचा मोठा फायदा शिवसेनेला (एकनाथ शिंदे) झाल्याचे दिसून आले. धारावी विधानसभा मतदारसंघ राखण्यात गायकवाड कुटुंबियांना यश आले आहे. धारावी मतदारसंघातून डॉ. ज्योती गायकवाड विजयी झाल्या.

हेही वाचा…रश्मी शुक्ला पुन्हा पोलीस महासंचालकपदी; गृह विभागाकडून मुख्यमंत्र्यांकडे प्रस्ताव

नाराजीचा फटका

शीव कोळीवाडा विधानसभा मतदारसंघातून भाजपचे कॅप्टन आर तामिळ सेल्वन यांनी सलग तिसऱ्यांदा चुरशीच्या लढतीत विजय मिळवला आहे. या निवडणुकीत त्यांना एकूण ७३ हजार ४२९ मते मिळाली. त्यांनी काँग्रेसचे उमेदवार गणेशकुमार यादव यांचा ७८९५ मतांनी पराभव केला. शीव कोळीवाडा मतदारसंघातील उमेदवारीवरून काँग्रेसमध्ये धुसफूस सुरू होती. काँग्रेसने गणेशकुमार यादव यांना उमेदवारी दिल्यानंतर मुंबई महानगरपालिकेतील विरोधी पक्षनेतेपद भूषविलेले रवी राजा यांनी नाराजी व्यक्त केली. अखेर रवी राजा यांनी काँग्रेसबरोबर काडीमोड घेत भाजपमध्ये प्रवेश केला. यामुळे काँग्रेसमधील बहुसंख्य कार्यकर्ते नाराज झाले होते. या नाराजीचा काँग्रेसला फटका बसला.

नऊ वेळा विजय

ज्योती गायकवाड यांनी शिवसेनेच्या (एकनाथ शिंदे) राजेश खंदारे यांचा पराभव केला. ज्योती गायकवाड यांनी शिंदे गटाच्या राजेश खंदारे यांचा २३ हजार ४५९ मतांच्या मोठ्या फरकाने पराभव केला. खासदार व मुंबई काँग्रेस अध्यक्ष वर्षा गायकवाड यांनी बहिणीला निवडणूक आणण्यासाठी फक्त धारावी मतदारसंघातच लक्ष केंद्री केले होते. त्याचा फटका काँग्रेसला मुंबईतील अन्य मतदारसंघात बसल्याची टीका होऊ लागली आहे. वडाळ्यात आमदार कालिदास कोळंबकर यांनी सलग नऊ वेळा विजय मिळवून विक्रम केला.