राज यांना आपल्याशी काय बोलायचयं ?

राजकारणातील योग्य टायमिंग आणि वकृत्वाच्या जोरावर सभा जिंकण्याचे कसब असलेला नेता म्हणून राज ठाकरे यांची महाराष्ट्रात ओळख आहे. आपल्या एकखांबी नेतृत्वाच्या जोरावर राज यांच्या महाराष्ट्र नवनिर्माण सेनेने महाराष्ट्रात आपले महत्वाचे स्थान निर्माण करण्यातसुद्धा यश मिळवले. यापूर्वीच्या निवडणुकांमध्ये जिंकण्यापेक्षा मतविभाजन करण्याच्या उपद्रवमुल्यामुळे ‘मनसे’ने राजकारणातील आपली उपयुक्तता सिद्ध केली होती. मागील लोकसभा आणि विधानसभा निवडणुकांत राज यांच्या व्यक्तिगत करिष्म्यामुळे शिवसेना आणि भाजप युतीला मोठ्या प्रमाणावर नुकसान सहन करावे लागले होते. महाराष्ट्रातील जनतेला एकहाती सत्ता देण्याचे आव्हान करणाऱ्या राज ठाकरे यांना नाशिक महानगरपालिकेत ‘मनसे’ची सत्ता आल्यानंतर विशेष असे काही करून न दाखवता आले नाही. त्यामुळे त्यांनी दिलेल्या आश्वासनांचा दावा सपशेल खोटा ठरला आहे. यंदाच्या लोकसभेतसुद्धा ‘मनसे’कडे ठोस असा कार्यक्रम आणि पात्र उमेदवारांची वानवा होती. मात्र, तरीही आपल्या राजकीय चातुर्याचा वापर करून राज यांनी लोकसभेसाठी भाजपचे पंतप्रधानपदाचे उमेदवार नरेंद्र मोदी यांना पाठिंबा जाहिर केला. मात्र, नरेंद्र मोदींच्या लाटेपुढे लोकसभेत मनसेचे पुरते पानिपत झालेले पहायला मिळाले. राज यांची बहुप्रतिक्षीत ‘ब्लु प्रिंट’ कधी जाहीर होणार याबद्दल विचारल्यावर त्यांनी नेहमीच उडवाउडवीची उत्तरे दिली. त्यामुळे कंटाळलेल्या जनतेने विकासाचा ठोस असा अजेंडा हाती असणाऱ्या महायुतीच्या पारड्यात आपले दान टाकले. मागील लोकसभेत लाखांच्यावर मते घेणाऱ्या मनसेच्या उमेदवारांचे डिपॉझिटच जप्त झाल्याने ‘मनसे’चे पितळ पुरते उघडे पडले. याच पार्श्वभूमीवर आपली आणि पक्षाची भूमिका मांडण्यासाठी राज ठाकरे आज (शनिवारी) मुंबईत जनतेला सामोरे जात आहेत. त्यामुळे राज आजच्या सभेत नक्की काय बोलणार याविषयीच्या चर्चांना उधाण आले आहे. राज ठाकरे आज काही प्रमुख अशा मुद्द्यांवर आपली भूमिका मांडू शकतात, काय असू शकतात हे मुद्दे ?…