अवैध कॉल सेंटरद्वारे अमेरिकेतील नागरिकांना प्रतिबंधात्मक औषधांची विक्री; १० जणांना अटक, तिघांचा शोध सुरू

हेही वाचा >>> दक्षिण मुंबईत बुधवार, गुरुवारी पाणी पुरवठा बंद; जे. जे. रुग्णालय परिसरात कमी दाबाने पाणीपुरवठा

अंधेरी पूर्व येथील द समिट बिझनेस बेमधील(ओमकार) तिसऱ्या मजल्यावरील ग्लोबल सर्विसेस येथे अवैध कॉल सेंटर सुरू असल्याची माहिती गुन्हे शाखेच्या कक्ष १० च्या पोलिसांना मिळाली होती. त्या माहितीच्या आधारे शनिवारी गुन्हे शाखेने या ठिकाणी छापा टाकला असता साकीब मुस्ताक सय्यद(३८), यश शर्मा(२६) व एका साथीदाराच्या मदतीने अवैध कॉल सेंटर चालवत असल्याचे निष्पन्न झाले. त्यांच्यासाठी आठ मुले कॉल सेंटरवर काम करत होते. ते व्हिओआयपी यंत्रणेद्वारे अमेरिकेतील नागरिकांना विविध औषध कंपन्यांच्या नावाने दूरध्वनी करून व्हायग्रा, सियालिस, लिविट्रो व ट्रेमोडोल या सारख्या प्रतिबंधात्मक औषधांची सलमान मोटरवाला या मुंब्रा येथे राहणाऱ्या व्यक्तीमार्फत विक्री करत असल्याचे निष्पन्न झाले. त्या मार्फत आरोपींनी केंद्र व राज्य सरकारचा महसुल बुडवला आहे. या छाप्यानंतर याप्रकरणातील संशयीत इरफान कुरेशी, सलमान मोटरवाला व राशीद अन्सारी यांनी सर्वर बंद करून तेथील यंत्रणेतील फाईलही डिलिट करून पुरावे नष्ट केले. याप्रकरणी गुन्हे शाखेने तीन मोबाईल संच, एक लॅपटॉप, एक सर्वर, २४ हार्ड डिस्क, एक राऊटर असा मुद्देमाल जप्त केला आहे. याप्रकरणी फसवणूक, तोतयागिरी व माहिती तंत्रज्ञान प्रतिबंधक कायद्या अंतर्गत गुन्हा दाखल करण्यात आला आहे. तपासणीत आरोपींकडे कॉल सेंटर चालवण्याचा कोणताही परवाना साडलेला नाही. आरोपींनी अमेरिकतील अनेक नागरिकांना प्रतिबंधात्मक औषधांची विक्री केली असून त्याबाबत आता गुन्हे शाखा तपास करत आहे. याप्रकरणी साकीब सय्यद(३८), यश शर्मा(२६) यांच्यासह कॉलसेंटरमध्ये काम करणारे उजेर शेख(२६), जुनैद शेख(२२), गौतम महाडीक(२३), जीवन गौडा(२१), मुनीद शेख(४०), हुसैन शेख(२३), विजय कोरी(३८), मोहम्मद सुफीयान मुकादम(२०) यांना अटक केली आहे. यातील शर्मा हा व्यवसायाने वकील असून तेथे विधी सल्लागार म्हणून काम करत होता.