संकटग्रस्त न्यू इंडिया बँक सारस्वत बँकेच्या छत्राखाली, आज घोषणा; हजारो ठेवीदारांना दिलासा

एनआयसीबीच्या निधीतून विविध कंपन्यांच्या नावे कर्जासाठी रकमा काढून प्रत्यक्षात त्या स्वतःच्या बनावट कंपन्यांकडे वळत्या केल्याचे आढळून आले. सक्तवसुली संचालनालय (ईडी) आणि मुंबई पोलिसांची आर्थिक गुन्हे शाखा या दोन तपासयंत्रणा या घोटाळ्यातील प्रकरणांची चौकशी करत आहेत. या घटनेनंतर रिझर्व्ह बँकेने एनआयसीबीचे बहुतेक व्यवहार १२ महिन्यांसाठी स्थगित केले आणि या बँकेवर प्रशासकही नेमला. तसेच तरलतेची नाजूक स्थिती लक्षात घेऊन ठेवीदारांवर त्यांच्या बचत वा चालू खात्यातून रक्कम काढण्यावर प्रतिबंध आले. ठेवींवरील विमा हमी म्हणून पाच लाख रुपयांपर्यंतची रक्कम काढण्याची मुभा ठेवीदारांना देण्यात आली आहे.

अशा कालखंडात एनआयसीबीचा ताबा सारस्वत बँकेसारख्या मोठ्या, प्रतिष्ठित आणि सुरक्षित बँकेकडे जाणे हा संकटग्रस्त ठेवीदारांसाठी मोठा दिलासा ठरणार आहे. १०६ वर्षे जुन्या सारस्वत बँकेकडे ९३ हजार कोटी रुपयांच्या ठेवी आहेत. आजवर नऊ बँकांचे यशस्वी अधिग्रहण सारस्वत बँकेने केले आहे. गेल्या तीन वर्षांमध्ये बुडीत वा कर्जाची कोणतीही नोंद झालेली नाही. आठ राज्यांमध्ये ३००हून अधिक शाखा, ३५०हून अधिक एटीम केंद्रे आहेत. ऑनलाइन खाते उघडण्यासाठी मोबाइल ॲपचा वापर सुलभ करणारी ही देशातली पहिलीच नागरी सहकारी बँक आहे.