विविध चित्रपट महोत्सवांमध्ये गौरविलेल्या ‘चिडिया’ या हिंदी चित्रपटाचा ट्रेलर प्रदर्शित, मराठमोळी अभिनेत्री अमृता सुभाष प्रमुख भूमिकेत

की मीडिया वर्क्सच्या सहकार्याने आणि उदाहरणार्थ निर्मित ‘चिडिया’ चित्रपटाची प्रस्तुती स्मायली फिल्म्स यांनी केली आहे. मुंबईमधील चाळीतील घरात राहणाऱ्या शानू आणि बुआ या दोन उत्साही भावांची हृदयस्पर्शी गोष्ट आहे. हे दोघे केवळ कल्पनाशक्ती, त्यांची आई आणि समाजातील लोकांच्या मदतीने त्यांच्या परिस्थितीपेक्षा खूप मोठ्या स्वप्नाचा पाठलाग कसा करतात? मुले स्वतःची स्वप्ने जिवंत ठेवण्यासाठी कशाप्रकारे लढा देतात? या प्रवासाची एक रंजक गोष्ट चित्रपटात दाखविण्यात आली आहे.

चित्रपटाविषयी दिग्दर्शक मेहरान अमरोही म्हणाले की, ‘चिडिया’ चित्रपट म्हणजे बालपणाला लिहिलेले प्रेमपत्र आहे. हा चित्रपट उघड्या डोळ्यांनी स्वप्ने पाहण्याविषयी आहे. आपल्या आशा व आकांक्षा कधीही जुन्या होत नाही याची हा चित्रपट शांतपणे आठवण करून देतो.‘चिडिया’ चित्रपटाने विविध राष्ट्रीय चित्रपट महोत्सवांसह जागतिक स्तरावरील चित्रपट महोत्सवांमध्येही लोकप्रियता मिळवली आहे.

चेक रिपब्लिक (झ्लिन आयएफएफ), द नेदरलँड्स (सिनीकिड), द यूएसए (एसएआयएफएफ), रशिया (स्पिरिट ऑफ फायर आयएफएफ), इराण (मुलांसाठी आणि प्रौढांसाठी आयएफएफ) अशा अनेक देशांतील प्रतिष्ठित महोत्सवांमध्ये ‘चिडिया’ चित्रपटाने प्रेक्षकांची मने जिंकली आहेत. या चित्रपटात महत्वाच्या कलाकारांसह बालकलाकार स्वर कांबळे, आयुष पाठक आणि हेतल गडा यांच्याही प्रमुख भूमिका आहेत. तर चित्रपटाचे संगीत शैलेंद्र बर्वे, संकलन मोहित टाकळकर, कलादिग्दर्शन प्रितेश खुशवाह यांचे आहे, तर वितरण रिलायन्स एंटरटेनमेंट करीत आहे.