Mumbai Monorail Suspended: मोनोरेल आजपासून अनिश्चित काळासाठी बंद; प्रवाशांना पर्यायी मार्गाचा वापर करावा लागणार

मोनोरेल सेवा काही काळासाठी बंद करून त्यादरम्यान मोनोरेलचे अत्याधुनिकरण करणे आणि नवीन प्रणाली कार्यान्वित करण्याची कामे मार्गी लावली जाणार आहेत. त्यामुळे मोनोरेलमधून दैनंदिन प्रवास करणाऱ्यांना आता पर्यायी वाहतूक व्यवस्थेचा वापर करावा लागणार आहे.

देशातील पहिली आणि एकमेव मोनोरेल मार्गिका म्हणून ओळखली जाणारी चेंबूर – संत गाडगे महाराज चौक मोनोरेल मार्गिका तोट्यात सुरू आहे. मोनोरेलचा उत्पन्न आणि खर्च यात मोठी तफावत आहे. सेवेत दाखल झाल्यापासून मोनोरेल अनेक वेळा विस्कळीत झाली होती.

मोनोरेलवरील दुर्घटना आणि अपघातांचे सत्र कायम सुरू आहे. मोनोरेलला २०१७ मध्ये लागलेल्या मोठ्या आगीची घटना असो की ऑगस्ट २०२५ मध्ये कलंडलेल्या गाडीतून ५८८ प्रवाशांना गाडीचा दरवाजा तोडून बाहेर काढण्याची दुर्घटना असो, या दुर्घटनांमुळे मोनोरेल प्रवाशांच्या सुरक्षेचा प्रश्न ऐरणीवर आला आहे. मोनोरेल सेवेबाबत नागरिकांकडून नाराजी व्यक्त केली जात आहे.

एमएमआरडीएकडून दावा

मोनोरेलच्या नवीन प्रणालीसाठी आणि अत्याधुनिकरणासाठी अधिक वेळ लागत असल्याने सेवा बंद करणे आवश्यक होते. त्यामुळे हा निर्णय घेण्यात आल्याचे एमएमआरडीएकडून सांगितले जात आहे. दरम्यान, ही सेवा किती दिवसांसाठी बंद राहणार, मोनोरेलचे पुन्हा संचलन केव्हा सुरू होणार हे अद्याप निश्चित नाही. पण जेव्हा मोनोरेलची सेवा पुन्हा सुरू होईल तेव्हा ती पूर्णतः सुरक्षित असेल, असा दावा एमएमआरडीएकडून करण्यात आला आहे.

आठ गाड्या मुंबईत दाखल

मोनोरेलच्या ताफ्यात नवीन अत्याधुनिक अशा नवीन दहा गाड्या दाखल केल्या जाणार आहेत. त्यानुसार आतापर्यंत सात गाड्या मुंबईत आल्या होत्या. तर आता नुकतीच आठवी गाडीही मुंबईत दाखल झाली आहे. येत्या काही दिवसांत उर्वरित दोन गाड्याही मुंबईत दाखल होणार आहेत. या गाड्या सेवेत दाखल करण्यासाठी आता नवीन प्रणाली विकसित करून नव्या प्रणालीच्या आणि गाड्यांच्या चाचण्या घेऊन, गाड्यांचा सुरक्षा प्रमाणपत्र प्राप्त करून त्या मोनोरेल मार्गिकेवर चालविण्यात येणार आहेत.