धानाचे पोती नेणारा ट्रक उलटला, वेग वाढविणे आले अंगलट…

गोंदिया : गोंदिया-कोहमारा मार्गाने धानाचे पोते भरून ट्रक जात होता. ट्रकच्या मागे वाहतूक शाखेच्या कर्मचाऱ्यांचे चारचाकी शासकीय वाहन येत होते. ते वाहन बघून भरधाव वेगात ट्रक चालवित असताना नियंत्रण सुटल्याने ट्रक रस्त्याच्या खाली जाऊन उलटला. या अपघातात ट्रकचे मोठ्या प्रमाणात नुकसान झाले तर चालक गंभीर जखमी झाला. ही घटना भडंगा गावाजवळ घडली.

गोंदिया-कोहमारा मार्गाने एमएच ४०, एके ००९८ क्रमांकाचा ट्रक धानाचे पोते घेऊन जात होता. दरम्यान भडंगा गावाजवळ भरधाव ट्रक रस्त्याखाली उतरून उलटला. दरम्यान एका झाडालाही धडक दिली. यात ट्रकचा चेंदामेंदा झाला. ट्रकमधील धानाचे पोते अस्ताव्यस्त पडले. प्रत्यक्षदर्शिनी दिलेल्या माहितीनुसार, धान भरून जाणारा ट्रक भरधाव जात होता. ट्रकच्या मागे वाहतूक शाखेचे शासकीय वाहन येत होते.

आणखी वाचा-चंद्रपूर : इरई धरण परिसरात परदेशी पाहुण्यांचे आगमन

कदाचित त्या वाहनाला बघून ते आपल्या मागावर तर नाही हे ग्राह्य धरून ट्रक चालकाने आपली गती वाढविली असता अपघात घडला. दरम्यान ट्रकच्या मागे येत असलेल्या वाहतूक शाखेच्या पोलिसांनी तातडीने जखमी चालकाला बाहेर काढून आपल्या वाहनाने उपचाराकरिता गोंदियाला नेले. ट्रकमधील धानाचे पोतेदेखील अस्ताव्यस्त पडले. अनेक पोते फाटून त्यातील धान खाली पडले. वाहतूक पोलिसांचे वाहन बघून भितीपोटी वेगाने ट्रक चालविला असावा, त्यातूनच हा अपघात घडल्याचे सांगण्यात येत आहे. वाहतूक पोलिसांनी या अपघाताची नोंद गोरेगांव पोलीस ठाण्यात केली आहे.