अकोला : शहरातील बहुचर्चित अक्षय नागलकर तरुणाच्या बेपत्ता प्रकरणात धक्कादायक प्रकार पोलीस तपासात पुढे आला आहे. दिवाळीच्या दिवशी आठ जणांनी अक्षयला जेवणासाठी हॉटेलमध्ये बोलावून त्याची निर्घृण हत्या केली. त्यानंतर त्याचा मृतदेह शेतातून जाळून टाकल्याची घटना उघडकीस आली. या प्रकरणी पोलिसांनी चार आरोपींना अटक केली असून इतरांचा शोध घेतला जात आहे.
शहरातील डाबकी रोड पोलीस ठाण्यामध्ये शिला विनायक नागलकर यांनी त्यांचा मुलगा अक्षय नागलकर (वय २६ वर्ष, रा. मारोती नगर, जुने शहर) हा २२ ऑक्टोबर रोजी सायंकाळी ५ वाजता बाहेर जाऊन येतो, असे सांगून घरून गेल्यानंतर बेपत्ता झाल्याची तक्रार नोंदवली. या प्रकरणी पोलीस अधीक्षकांनी शहर उपविभागीय पोलीस अधिकारी व स्थानिक गुन्हे शाखेला चौकशीसाठी पथके गठीत करण्याचे आदेश दिले.
स्थानिक गुन्हे शाखेचे चार, डाबकी रोड पोलिसांचे दोन व उपविभागीय पोलीस अधिकाऱ्यांचे दोन असे एकूण आठ पथकांनी शोध सुरू केला. सतत ४८ तास शोध कार्य राबवून तांत्रिक माहितीवरून संशयित चंद्रकांत बोरकर याला ताब्यात घेतले. चौकशीमध्ये त्याने ब्रम्हा भाकरे, रोहित पराते, क्रिष्णा भाकरे, आशु वानखडे, शिवा माळी, आकाश शिंदे व अमोल उन्हाळे या आठ जणांनी अक्षयला भौरद येथील हॉटेल एमएच ३० येथे जेवणासाठी बोलावले. पूर्ववैमनस्यातून त्याची हत्या करण्यात आली.
मृतदेह ब्रम्हा भाकरे याचे मोरगाव भाकरे येथील शेतातील टिनाच्या शेडमध्ये जाळून टाकल्याची कबुली आरोपींनी दिली. या प्रकरणात चंद्रकात बोरकर, ब्रम्हा भाकरे, क्रिष्णा भाकरे, आशू वानखडे यांना अटक करण्यात आली आहे.
गुन्ह्यातील इतर आरोपींचा शोध पथकांद्वारे घेतला जात आहे. पुढील तपास शहर उपविभागीय पोलीस अधिकाऱ्यांकडून सुरू आहे. ही कारवाई पोलीस अधीक्षक अर्चित चांडक, अपर पोलीस अधीक्षक बी. चंद्रकांत रेड्डी यांचे मार्गदर्शनाखाली उपविभागीय पोलीस अधिकारी सुदर्शन पाटील, प्रभारी अधिकारी डाबकी रोड पोलीस ठाणे अभिषेक अंधारे, स्थानिक गुन्हे शाखेचे सपोनि गोपाल ढोले, पोउपनि गोपाल जाधव, पोउपनि अनिल चव्हाण आदींनी केली. या घटनेमुळे शहरात मोठी खळबळ उडाली आहे. इतर आरोपींना पकडण्याचे मोठे आव्हान अकोला पोलिसांपुढे राहणार असून त्यांचा कसून शोध घेतला जात आहे.
