नागपूर: राष्ट्रीय स्वयंसेवक संघाच्या स्थापनेला तारखेनुसार शनिवार २७ सप्टेंबरला शंभर वर्षे पूर्ण होत आहेत. यानिमित्त तीन पथसंचलनांचे आयोजन करण्यात आले आहे. पहिल्यांदाच तीन स्थानांवरून एकाचवेळी ही पथसंचलने सुरू होईल आणि याचे एकत्रीकरण व्हरायटी चौक येथे सायंकाळी ७.४५ वाजता होणार आहे. राष्ट्रपिता महात्मा गांधी यांच्या हत्येचे संघावर अनेकदा आरोप झाले आहेत. मात्र शताब्दी वर्षात सरसंघचालक डॉ. मोहन भागवत व्हेरायटी चौकातील महात्मा गांधी यांच्या पुतळ्यासमोर पथसंचलनांचे अवलोकन करणार आहेत. या पथसंचलनामध्ये २१ हजार गणवेशधारी स्वयंसेवकांचा सहभाग असेल, असा अंदाज व्यक्त करण्यात आला आहे.
राष्ट्रीय स्वयंसेवक संघाच्या ऐतिहासिक अशा विजयादशमी उत्सवाची जय्यत तयारी सुरू आहे. यावर्षीच्या सोहळ्याला संघ परिवारातील विविध संस्थांच्या प्रमुखांसह तब्बल पंधरा हजारांवर गणवेशधारी स्वयंसेवक उपस्थित राहणार आहेत. याशिवाय संघाने विविध देशांच्या आंतरराष्ट्रीय दुतावासांनाही कार्यक्रमाचे निमंत्रण दिले आहे. त्यामुळे यावर्षी विदेशी पाहुणे, चित्रपट अभिनेते, उद्योजक अशा विविध क्षेत्रातील लोक उपस्थित राहणार आहे. शनिवारी होणारे पहिले पथसंचलन कस्तुरचंद पार्क, दुसरे यशवंत स्टेडियम आणि तिसरे अमरावती महामार्गावरील हॉकी मैदान येथून सायंकाळी ७ वाजता सुरू होईल.
संचलन क्रमांक एकचा मार्ग कस्तुरचंद पार्क, संविधान चौक, झिरो माइल, व्हरायटी चौक, महाजन मार्केट, हॉटेल गणराज, टेकडी हनुमान मंदिर मार्ग, झीरो माइल, संविधान चौक, कस्तुरचंद पार्क असा असेल. यामध्ये मोहिते, लालगंज, बिनाकी, सदर भागातील स्वयंसेवक असतील. संचलन क्रमांक दोनचा मार्ग यशवंत स्टेडियम, मुंजे चौक, व्हरायटी चौक, झाशी राणी चौक, पंचशील चौक, जनता चौक, हम्पयार्डटी पॉइंट, धंतोली पोलिस स्टेशन चौक, मेहाडिया चौक, यशवंत स्टेडियम असा असून यामध्ये इतवारी, अजनी, अयोध्यानगर, नंदनवन भागातील स्वयंसेवकांचा समावेश असेल. संचलन क्रमांक तीनचा मार्ग अमरावतील मार्गावरील हॉकी मैदान, व्हरायटी चौक, फ्रीडम पार्क चौक, राष्ट्रसंत तुकडोजी महाराज नागपूर विद्यापीठ, भारतीय हॉकी मैदान असा राहणार असून यात धरमपेठ, त्रिमूर्तीनगर, सोमलवाडा, गिट्टीखदान भागातील स्वयंसेवक असतील.
देशभरात पथसंचलनाचे आयोजन
शताब्दी वर्ष सोहळ्याला उपस्थित राहण्यासाठी अनेक स्वयंसेवक इच्छुक आहेत. मात्र, मैदानाची मर्यादा पाहता सर्वांना प्रवेश मिळणे अशक्य आहे. त्यामुळे यावर्षी नागपूरसह देशभरात संघाच्या शाखा असणाऱ्या विविध भागांमध्येही शताब्दी सोहळा साजरा होणार आहे. तसेच, नागपूरसह विविध शहरांमध्ये पथसंचलनाची तयारी सुरू असून प्रत्येकाने आपल्या भागात पथसंचलन करून शताब्दी सोहळा साजरा करावा, अशा सूचना देण्यात आल्याची माहिती आहे.
