नागपूर : युवकाने चॉकलेट देण्याचे आमिष दाखवून एका नऊ वर्षाच्या चिमुकलीवर लैंगिक अत्याचार केला. कुणालाही सांगितल्यास आई बाबांना ठार मारण्याची धमकी दिली. ही संतापजनक घटना काचीपुऱ्यात घडली. या प्रकरणी तक्रारीवरून आरोपी दिनेश किल्लारे (३०) रा. काचिपुरा याच्याविरुद्ध गुन्हा नोंदवून त्याला अटक करण्यात आली. आरोपी दिनेश कल्लारे हा मूळचा बालाघाट, मध्यप्रदेशातील असून मागील सहा महिन्यांपापून नागपुरात राहात आहे. वर्षभरापूर्वी त्याचे लग्न झाले. मात्र, पत्नी सोडून गेल्यानंतर तो नागपुरात आला. काचिपुऱ्यातील एका फरसानच्या दुकानात काम करीत होता. दुकान मालकाने जवळच त्याची राहण्याची व्यवस्था केली. दुकानात दिनेशसह तिघे जण काम करतात. त्यापैकी दिनेश हा नेहमीच दुकानात असायचा. घटनेच्या वेळी म्हणजे रविवार २८ एप्रिलला सायंकाळच्या सुमारास दिनेश दुकानात होता. फिर्यादीची ९ वर्षाची मुलगी परिसरात खेळत होती. दिनेशने तिला बोलाविले. चॉकलेट देण्याचे आमिष दाखवून तिला खोलीत नेले. तिच्यावर लैंगिक अत्याचार केला. तिने आरडाओरड केली.“कुणाला काही सांगायचे नाही, अन्यथा तुझ्या आई बाबांचा खून करेल’ अशी धमकी दिली. पीडित चिमुकली घरी गेली. काही वेळानंतर तिने सारा प्रकार आईला सांगितला. फिर्यादीने बजाजनगर पोलीस ठाणे गाठले. घटनेचे गांभीर्य लक्षात घेता पोलिसांनी आरोपी विरूध्द विविध कलमान्यवे गुन्हा नोंदवून अटक केली आहे. दरम्यान, असाच प्रकार आरोपीने एका सात वर्षाच्या मुलीसोबत केल्याचे पोलीस तपासात पुढे आले आहे. त्यामुळे आणखी मुलींशी असाच प्रकार झाल्याची शक्यता नाकारता येत नाही. त्यामुळे पोलीस सखोल चौकशी करीत आहेत.
