नागपूरः मध्य प्रदेशातील छिंदवाडा परिसरातील खोकल्यासाठी कफ सिरप पिल्यावर मृत्यू होणाऱ्या मुलांची संख्या वाढतच आहे. नागपुरात दाखल आणखी एका तीन वर्षीय मुलाचा रुग्णालयात मृत्यू झाला. खोकला झाल्यावर बरे होण्यासाठी घेतलेले औषध त्याच्या मृत्यूला कारणीभूत ठरले काय? हे आता विश्लेषण अहवालातून स्पष्ट होईल.
मयांक सूर्यवंशी (३) असे बुधवारी रात्री उशिरा दगवलेल्या मुलाचे नाव आहे. नागपुरातील शासकीय वैद्यकीय महाविद्यालय व रुग्णालय (मेडिकल), अखिल भारतीय आयुर्विज्ञान संस्थान (एम्स) आणि इतर खासगी रुग्णालयांत आजपर्यंत छिंदवाडा परिसरातील कफ सिरप प्राशन केलेले एकूण ३६ रुग्ण दाखल झाले. त्यापैकी आजपर्यंत १६ रुग्णांचा मृत्यू झाला. सर्व रुग्ण दोन ते १६ वर्षे वयोगटातील आहेत. नागपुरातील विविध रुग्णालयांत दगावलेल्यांपैकी १५ रुग्ण छिंदवाडा परिसरातील तर एक रुग्ण शिवनी येथील आहे. कफ सिरपशी संबंधित रुग्णांच्या स्वतंत्र नोंदी ठेवण्याची तरतूद नसल्याने अचूक आकडेवारी पुढे येत नव्हती. परंतु, नागपूर महापालिकेच्या आरोग्य विभागाने पुढाकार घेत शहरातील विविध रुग्णालयांशी समन्वय साधून आकडेवारी गोळा केली. तूर्तास शहरात ७ रुग्ण दाखल आहेत. त्यापैकी ३ रुग्ण जीवनरक्षण प्रणालीवर आहेत. सर्वाधिक रुग्ण मेडिकल या एकाच रुग्णालयात आहेत.
‘सिरप’वर बंदीनंतर रुग्णसंख्या घटली
मध्य प्रदेश सरकारने ‘कोल्ड्रिफ’ या कफ सिरपवर बंदी घातली आहे. या सिरपमध्ये डायथिलीन ग्लायकोल (डीईजी)चे प्रमाण ४६ टक्के आढळले होते. रुग्णांना सिरप देणे बंद झाल्याने रुग्णांची संख्या कमी झाली, असे निरीक्षण नागपुरातील वैद्यकीय क्षेत्राकडून नोंदवण्यात आले.
नागपूर महापालिकेचे म्हणणे काय ?
नागपुरातील विविध रुग्णालयांत मध्य प्रदेशातून एकूण ३६ रुग्ण आले. त्यापैकी १६ जणांचा मृत्यू झाला. मृत्यू अंकेक्षणात मृत्यूचे कारण स्पष्ट होईल. सध्या ७ रुग्ण विविध रुग्णालयांत उपचार घेत आहेत, अशी माहिती नागपूर महापालिकेच्या आरोग्य विभागाने दिली.
मध्य प्रदेशचे मुख्यमंत्री आज नागपुरात ?
मध्य प्रदेशचे मुख्यमंत्री मोहन यादव गुरुवारी नागपुरात येत आहे. ते कफ सिरफ प्रकरणातील नागपुरातील विविध रुग्णालयात दाखल रुग्णांच्या प्रकृतीचा आढावा घेण्याचे संकेत आहे. दरम्यान ते मेडिकल रुग्णालयासह काही रुग्णालयात रुग्ण व त्यांच्या नातेवाईकांची भेट घेण्याची शक्यता असल्याची माहिती वैद्यकीय क्षेत्रातील तज्ज्ञांनी दिली. यापूर्वी मध्यप्रदेशचे उपमुख्यमंत्री आणि आरोग्यमंत्री शुक्ल यांनीही मेडिकलला भेट दिली आहे.
