बाबरी मशीद उभारणे अपवित्र कार्य, माजी सरन्यायाधीश चंद्रचूड यांचे राममंदिर निकालावर…..

काय म्हणाले माजी सरन्यायाधीश?

माजी सरन्यायाधीश डी.वाय. चंद्रचूड यांनी अयोध्या वादावर केलेल्या एका वक्तव्यामुळे नवीन वाद निर्माण झाला आहे. न्यूजलॉन्ड्रीचे पत्रकार श्रीनिवासन जैन यांना दिलेल्या मुलाखतीत त्यांनी बाबरी मशीद उभारणे हेच मूळ “अपवित्रतेचे कृत्य” होते, असे म्हटले. जैन यांनी प्रश्न केला की, १९४९ मध्ये हिंदू पक्षांनी मशिदीत मूर्ती ठेवणे किंवा इतर प्रकारची तोडफोड करणे हीसुद्धा अपवित्रतेची कृत्ये होती का? यावर प्रत्युत्तर देताना माजी सरन्यायाधीश म्हणाले – “मूळ अपवित्रतेचे कृत्य म्हणजेच त्या मशिदीचे बांधकाम होते.

आपण ते विसरतो का? इतिहासात जे घडले ते दुर्लक्षित करता येणार नाही.” त्यांनी पुढे सांगितले की, सर्वोच्च न्यायालयाच्या २०१९ च्या निकालात पुरातत्त्वीय पुरावे नमूद आहेत. त्या पुराव्यांवरून मशिदीखाली मंदिराचे अवशेष असल्याचे सिद्ध होते. “इतिहासात जे काही झाले ते पुराव्याच्या स्वरूपात आपल्यासमोर आहे, ते आपण नजरेआड करू शकत नाही,” असे ते म्हणाले. मात्र, जैन यांनी निदर्शनास आणून दिले की सर्वोच्च न्यायालयाच्या निकालात स्पष्टपणे म्हटले आहे – मशिद बांधण्यासाठी मंदिर पाडण्यात आले, याचे ठोस पुरावे उपलब्ध नाहीत. तसेच मशिद आणि खालच्या रचनेत शतकांचा मोठा फरक असल्याचेही न्यायालयाने नमूद केले होते.

यावर माजी सरन्यायाधीश म्हणाले की, पुरातत्त्व खात्याचा अहवाल हा स्वतः एक पुरावा आहे. त्याचे मूल्यांकन कसे करायचे हा वेगळा प्रश्न आहे. “निकालावर टीका करणाऱ्यांनी निकाल व्यवस्थित वाचलेला नाही. ते फक्त निवडक इतिहासावर भर देतात आणि बाकी सर्व विसरतात,” असे त्यांनी म्हटले. मशिदीचे बांधकाम जर अपवित्रतेचे कृत्य होते, तर तिला पाडणे योग्य ठरेल का? असा प्रश्न जैन यांनी केला. त्यावर चंद्रचूड यांनी स्पष्ट केले – “असे अजिबात नाही. निकाल हा केवळ कायदेशीर तत्त्वांवर, पुराव्यांच्या आधारे आणि पारंपरिक मापदंड लावूनच दिला आहे. तो केवळ श्रद्धेवर आधारलेला आहे, अशी टीका चुकीची आहे.”