..आता हिवतापग्रस्त रुग्णाची माहिती दिल्यास मांत्रिकालाही मानधन मिळणार, गडचिरोलीत

गडचिरोली जिल्हा हा हिवतापाच्या दृष्टीने देशात अतिसंवेदनशील मानला जातो. याठिकाणी दरवर्षी हजारोच्या संख्येने हिवतापाचे रुग्ण आढळतात. यातील बहुतांश प्रभावीत भाग आदिवासीबहुल आणि दुर्गम असल्याने उपचारात विलंब होतो. सोबतच अनेक रुग्ण उपचारासाठी रुग्णालयात जाण्याऐवजी पुजाऱ्याकडे जात असल्याचेही अनेकदा समोर आले आहे. परिणामी योग्य उपचाराअभावी रुग्ण दगावण्याचेही प्रमाण वाढत आहे.

यावर तोडगा काढण्यासाठी रुग्णांची माहिती देणाऱ्या पुजाऱ्यालाही मानधन देण्याची शिफारस समितीने केली आहे. बैठकीमध्ये झालेल्या चर्चेत हिवतापाची लक्षणे दिसताच तात्काळ उपचार सुरू करून मृत्यू टाळणे हेच मूळ उद्दिष्ट असावे, असे स्पष्ट करत त्यांनी सर्व संबंधित विभागांना जबाबदारीने उपाययोजना करण्याचे निर्देश दिले. जिल्हाधिकाऱ्यांनी सांगितले की, हिवतापामुळे होणाऱ्या मृत्यूंची स्वतंत्रपणे छाननी करून त्यामागील वास्तविक कारणांचा शोध घेणे आवश्यक आहे. यामुळे कुठल्या टप्प्यावर दुर्लक्ष झाले आहे, याची माहिती मिळून त्यावर त्वरित उपाय करता येतील.

टास्क फोर्स व समितीच्या सूचनांची अंमलबजावणी

हिवताप निर्मूलनासाठी गठीत कार्यबल व अंमलबजावणी समितीच्या शिफारशी प्रत्यक्षात कितपत राबवल्या गेल्या याची माहिती घेण्यात आली. तसेच स्थानिक पुजाऱ्यांकडे येणारी संशयित रुग्णांची प्रकरणे आरोग्य विभागाकडे पाठविल्यास प्रत्येक प्रकरणानुसार पुजाऱ्यांना प्रोत्साहनपर मानधन देण्याच्या सूचनेची अंमलबजावणी करण्याच्या सूचना जिल्हाधिकाऱ्यांनी दिल्या. बैठकीत तज्ञांनी दिलेल्या माहितीनुसार हिवताप प्रभावित क्षेत्रांमध्ये अतिरिक्त मनुष्यबळाची नेमणूक करणे तसेच विद्यमान कर्मचाऱ्यांना प्रशिक्षण देणे अत्यावश्यक असल्याचे नमूद करण्यात आले.

यावेळी जिल्हा परिषदेचे मुख्य कार्यकारी अधिकारी सुहास गाडे, जिल्हा शल्य चिकित्सक डॉ. माधुरी किलनाके, जिल्हा आरोग्य अधिकारी डॉ. प्रताप शिंदे, जिल्हा हिवताप अधिकारी डॉ. सुजिता वाडिवे, महिला व बालकल्याण अधिकारी सौ. ज्योती कडू आदी मान्यवर उपस्थित होते. तसेच सर्व तालुका आरोग्य अधिकारी, गटविकास अधिकारी व संबंधित अधिकारी दूरदृष्य प्रणाली द्वारे उपस्थित होते.