‘नीट’ची भीती! निकाल लागण्यापूर्वीच तरुणाने संपविले जीवन…

शिक्षणातील मानसिक तणावाने आणखी एक तरुण बळी घेतल्याने हळहळ व्यक्त केली जात आहे. ही घटना तुमसर तालुक्यातील हसाराटोली गावात घडली आहे. अमित रमेश बिसने असे आत्महत्या केलेल्या युवकाचे नाव आहे. अमित मागील अनेक महिन्यांपासून वैद्यकीय प्रवेशासाठी आवश्यक असलेल्या नीट परिक्षेची तयारी करत होता. या वर्षीचा निकाल शनिवारी लागणार असल्याने तो प्रचंड तणावात होता. भीतीच्या भरात तरूणाने टोकाचं पाऊल उचललं. याप्रकरणी गुन्हा नोंद करण्यात आला असून, पुढील तपास पोलिसांकडून सुरू आहे.

नीटची परीक्षा देण्याची ही अमितची दुसरी वेळ होती. पहिल्या प्रयत्नात त्याला मिळालेल्या गुणांनी तो समाधानी नव्हता त्यामुळे त्याने पुन्हा एका परीक्षा देण्याचा निर्णय घेतला. यावेळी त्याने परीक्षेसाठी चांगली तयारी केली होती. मात्र पेपर सोडवून आल्यानंतर त्याला अपेक्षित गुण मिळतील किंवा नाही अशी भीती वाटू लागली. या वर्षीचा नीट परीक्षेचा निकाल शनिवारी, १४ जून रोजी लागणार असल्याने अमित प्रचंड तणावात होता, अशी माहिती त्याच्या कुटुंबीयांनी दिली.

वडील रमेश बिसने दिलेल्या माहितीनुसार, मागील वर्षी अमितला नीटमध्ये ५९६ गुण मिळाले होते. यंदा अपेक्षित यश मिळणार नाही, या भीतीने तो मानसिकदृष्ट्या खचला होता. या भीतीच्या भरात त्याने गळफास लावून आपले आयुष्य संपवले असावे, असा अंदाज त्यांनी व्यक्त केला आहे. घटनेच्यावेळी अमित घरी एकटाच होता. त्याने घरातील सिलिंग फॅनला दोरी लावून आत्महत्या केली. काही वेळाने कुटुंबीय घरी आल्यानंतर हा धक्कादायक प्रकार समोर आला. त्यांनी तात्काळ पोलिसांना याची माहिती दिली.

या प्रकरणी तुमसर पोलीस स्टेशनमध्ये भारतीय नागरी सुरक्षा संहिता कलम १९४ अंतर्गत गुन्हा नोंद करण्यात आला आहे. पोलीस अधिक तपास करत आहेत. या घटनेनंतर परिसरात हळहळ व्यक्त करण्यात येत आहे.