धक्कादायक! मोबाईलचा स्फोट; नशीब बलवत्तर म्हणून...

तुमसर तालुक्यातील प्रसिद्ध चांदपूर येथील हनुमान मंदिर परिसरात ही थरारक घटना घडली.

धक्कादायक! मोबाईलचा स्फोट; नशीब बलवत्तर म्हणून... (छायाचित्र- फ्रीपिक)

भंडारा: पँटच्या खिशातील मोबाईलमधून अचानक धूर निघू लागला. याची जाणीव होताच १२ वर्षीय मुलगा थोडा घाबरला, पण क्षणाचाही विलंब न करता त्याने मोबाईल खिशातून काढून बाहेर फेकला अन् जोरदार स्फोट झाला. तुमसर तालुक्यातील प्रसिद्ध चांदपूर येथील हनुमान मंदिर परिसरात ही थरारक घटना घडली. नशीब बलवत्तर म्हणून मुलाचे प्राण वाचले.

इयत्ता सातवीत शिकणाऱ्या प्रीतम किशोर वाघरेच्या वडिलांचे चांदपूर येथील हनुमान मंदिर देवस्थानाच्या आवारात पूजा साहित्य विक्रीचे दुकान आहे. रविवारी शाळेला सुट्टी असल्याने प्रीतम नेहमीप्रमाणे वडिलांच्या दुकानात गेला. जाताना वडिलांचा वीवो कंपनीचा मोबाईल त्याने पँटच्या खिशात टाकला अन् दुकानाकडे निघाला. दुकानाजवळ पोहोचल्यानंतर त्याला पँटच्या खिशातून धूर निघत असल्याचे लक्षात आले.

हेही वाचा… चंद्रपूर : बालरोग चिकित्सा विभागात साहित्य खरेदीत लाखोंची उधळपट्टी, वैद्यकीय महाविद्यालयातील प्रकरण, चौकशीची मागणी

खिशात ठेवलेल्या मोबाईलमधून धूर निघत असल्याची जाणीव होताच प्रीतमने खिशात हात घालून तातडीने मोबाईल बाहेर काढला आणि फेकला. मोबाईल खिशातून बाहेर काढताच त्याचा स्फोट झाला. यामुळे तो थोडक्यात बचावला. मात्र, पँटच्या खिशात मोबाईलने पेट घेतल्याने त्याच्या पायाला जखम झाली. यावेळी उपस्थित नागरिकांनी त्याला मदत करून तातडीने खासगी रुग्णालयात दाखल केले. सध्या त्याची प्रकृती धोक्याबाहेर आहे. मात्र, मोबाईलचा स्फोट झाल्याने पालकांमध्ये भीतीचे वातावरण निर्माण झाले आहे.

धक्कादायक! मोबाईलचा स्फोट; नशीब बलवत्तर म्हणून…

तुमसर तालुक्यातील प्रसिद्ध चांदपूर येथील हनुमान मंदिर परिसरात ही थरारक घटना घडली.