नागपूर : बदनामी करणाऱ्या तक्रारी बंद करायच्या असतील तर ५ कोटी रुपये द्यावे लागतील, अशा धमक्या देऊन खंडणी मागणाऱ्या होमिओपॅथी महाविद्यालयाचे माजी प्राचार्य डॉ. गोपाल भुतडा याच्या विरोधात कोतवाली पोलिसांनी मंगळवारी गुन्हा दाखल केला.
डॉ. भुतडा याने अशा प्रकारे त्रास देत खंडणी मागण्याचे सत्र सुरू केल्याच्या आशयाची गंभीर तक्रार सतचिकित्सा प्रसारक मंडळाचे अध्यक्ष गंगाधर नाकाडे यांनी कोतवाली पोलिसांत दाखल केली आहे. यात डॉ. भुतडा हा सातत्याने वेगवेगळ्या लोकांमार्फत पाच कोटींच्या खंडणीची मागत असल्याचे नाकाडे यांनी दिलेल्या तक्रारीत नमूद केले आहे.
संस्थेतर्फे चालविण्यात येणाऱ्या आदर्श फार्मसी कॉलेजच्या बदनामीची धमकी तो देतो आहे, असेही त्यांचे म्हणणे आहे. या प्रकरणात त्याच ठिकाणी २०१२ पर्यंत कार्यरत असलेल्या होमिओपॅथी महाविद्यालयाचा माजी उपप्राचार्य डॉ. गोपाल भुतडाविरोधात (५२, वाठोडा) पोलिसांनी गुन्हा दाखल केला.
पाच कोटी खंडणीची सातत्याने मागणी होत असल्याची तक्रार दाखल करणारे फिर्यादी गंगाधर नाकाडे (वय ६०, रा. आनंद नगर, हुडकेश्वर रोड, नागपूर) हे सतचिकित्सा प्रसारक मंडळाचे अध्यक्ष आहेत. २०१२ पर्यंत ते या संस्थेच्या होमिओपॅथी कॉलेज कार्यरत होते. त्यावेळी डॉ. गोपाल राणीलालजी भुतडा हे उपप्राचार्य म्हणून काम करत होता.
मात्र, नंतर हे महाविद्यालय बंद झाले. त्यानंतर नाकाडे यांनी बी.फार्म व डी.फार्म अभ्यासक्रमांसाठी परवानगी मिळवून फार्मसी कॉलेज सुरू केले. कॉलेज सुरू होताच आरोपी डॉ. भुतडा यांनी विविध सरकारी व खासगी विभागांना १००हून अधिक तक्रारी करून संस्थेची बदनामी करण्यास सुरुवात केली. या तक्रारींची चौकशी होऊन त्या वारंवार निष्फळ ठरल्या. तरी डॉ. भुतडा याने बदनामी थांबवली नाही. यात भर म्हणून त्यांनी नाकाडे यांना प्रत्यक्ष व संदेशाद्वारे धमक्या देणे सुरू केले.
कधी ‘तुमचे कॉलेज बंद करून टाकीन’ तर कधी ‘माझे जुने सहकारी व प्राचार्यांचे कोट्यवधी रुपयांची थकबाकी आहे. ही रक्कम तुम्हीच पैसे द्या’, अशी मागणी त्याने नाकाडे यांना सुरू केली. याच पार्श्वभूमीवर, ३ जून २०२५ रोजी डॉ. भुतडा संस्थेचे कर्मचारी कुणाल गायकवाड यांना भेटला.
नाकाडे यांनी ५ कोटी रुपये आणून द्यावे. मग मी सर्व तक्रारी बंद करीन. अन्यथा तुमच्या संस्थेला वाईट दिवस पहावे लागतील, अशी धमकी त्याने गायवाड मार्फत दिली. या सततच्या धमक्या व खंडणीच्या मागण्यांमुळे संस्थेने तातडीची बैठक घेऊन पोलिसांत तक्रार करण्याचा निर्णय घेतला. त्या आधारे नाकाडे यांनी दाखल केलेल्या तक्रारीवरून कोतवाली पोलिस ठाण्यात गुन्हा दाखल करण्यात आला आहे.
