नागपूर : शहरात पिस्तुलाची खरेदी-विक्री करणाऱ्या टोळ्या सक्रिय झाल्यामुळे गुन्हे शाखेपुढे शहरातील गोळीबाराच्या घटनांवर नियंत्रण ठेवण्याचे आव्हान उभे ठाकले होते. पोलीस आयुक्तांच्या आदेशाने पोलिसांनी गस्त वाढवली. एका युवकाच्या घरातील हालचालींवर पोलिसांना संशय आला. त्यामुळे त्यांनी घरावर छापा घातला. या छाप्यात दोन काडतूस आणि पिस्तुलसह खरेदी-विक्री करणाऱ्यांची साखळीसुद्धा गवसली. पोलिसांनी ३ आरोपींना अटक केली असून दोन आरोपी फरार झाले आहेत. मोहम्मद फिरोज मोहम्मद आबिद अंसारी (२४) रा. दीनबंधू सोसायटी, गुलशननगर, करीम राजा मोहम्मद युनूस (२४) रा. मेमन कॉलनी, जुना कामठी रोड, कळमना आणि मोहम्मद शाकिब उर्फ पटेल मोहम्मद सिद्दीकी (२८) रा. संजीवनी कॉलनी, यशोधरानगर, अशी अटकेतील आरोपींची नावे आहेत. फरार आरोपी अब्दुल सोहेल उर्फ सोबू (रा. सतरंजीपुरा) आणि अजहर (रा. यशोधरानगर) यांचा शोध सुरू आहे.़ हेही वाचा : प्रेमविवाहानंतर पत्नीच्या चारित्र्यावर संशय; पतीने पत्नीला पाजले विष, पोलिसांनी… फिरोज हा काही दिवसांपासून पिस्तुलासह फिरत असल्याची माहिती गुन्हे शाखेला मिळाली होती. यावरून पोलिसांनी त्याला ताब्यात घेतले. त्याच्या घराच्या झडतीत पिस्तूल आणि दोन जीवंत काडतूस मिळाले. चौकशीत त्याने करीम राजा याच्याकडून पिस्तूल घेतल्याची माहिती दिली. करीमने शाकिब पटेलकडून पिस्तूल घेतल्याची माहिती दिली. पोलिसांनी तत्काळ शाकिब पटेल यालाही ताब्यात घेतले. त्याने सोहेल आणि अजहर यांची नावे सांगितले. मात्र दोन्ही आरोपी अद्याप पोलिसांच्या हाती लागलेले नाही. सोहेल हा सराईत गुन्हेगार आहे. त्याच्यावर अनेक गुन्हे दाखल आहेत. चोरीच्या प्रकरणात अनेकदा त्याला अटक सुद्धा झाली आहे. पुढील चौकशीसाठी तिन्ही अटकेतील आरेापींना कळमना पोलिसांच्या स्वाधिन करण्यात आले आहे. ही कारवाई मनीष रामटेके आणि अनिल बोटरे यांनी केली.
