अकोला : नराधम मुलाने आपल्या जन्मदात्या पित्याला काठीने मारहाण करून दोरीने गळा आवळत निर्घृण हत्या केल्याची धक्कादायक घटना जिल्ह्यातील पिंजर पोलीस ठाण्यांतर्गत ग्राम टिटवा येथे घडली. या प्रकरणी स्थानिक गुन्हे शाखा व पिंजर पोलिसांनी तपासाची सूत्रे वेगाने फिरवत पसार होण्याच्या मार्गावर असलेल्या आरोपीला काही तासांत अटक केली. बबन रामराव राऊत (वय ५५ वर्ष) असे मृतकाचे, तर नवनाथ बबन राऊत (वय २७ वर्ष) असे मारेकरी मुलाचे नाव आहे.
पिंजर पोलीस ठाण्यांतर्गत ग्राम टिटवा येथे बबन रामराव राऊत यांना त्यांचा मुलगा आरोपी नवनाथ बबन राऊत याने मंगळवारी मध्यरात्रीच्या सुमारास काठीने बेदम मारहाण केली. नराधम मुलगा एवढ्यावरच न थांबता त्याने दोरीने गळा आवळून आपल्या जन्मदात्याची निर्घृण हत्या केली. कौटुंबिक वादातून ही हत्या झाल्याची माहिती आहे. त्यानंतर घटनास्थळावरून आरोपी फरार झाला. या घटनेची माहिती मृतकाचे भाऊ विनोद रामराव राऊत यांनी पिंजर पोलिसांना दिली.
पिंजर पोलिसांनी घटनास्थळावर धाव घेऊन पंचनामा केला. मृतदेह उत्तरीय तपासणीसाठी रुग्णालयात पाठविण्यात आला. विनोद राऊत यांच्या फिर्यादीवरून पिंजर पोलीस ठाण्यात विविध कलमान्वये गुन्हा दाखल करण्यात आला. आरोपीचा शोध घेण्यासाठी पिंजर पोलिसांचे तीन वेगवेगळे पथके तयार करून ते रवाना करण्यात आले. स्थानिक गुन्हे शाखेच्या पथकाने सुद्धा शोध सुरू केला. वडिलांची हत्या करून आरोपी मुलगा रात्रभर शेतात दडून बसला होता. पिंजर पोलीस व स्थागुशाच्या पथकाने कसून शोध घेतला. आरोपी वाशीम जिल्ह्यातील शेलू येथून संभाजीनगर, पुणेच्या दिशेने जात असताना पोलिसांनी त्याच्या मुसक्या आवळल्या. आरोपीकडे मोबाइल नसल्याने त्याचा शोध घेणे आवाहनात्मक होते.
गोपनीय माहितीच्या आधारावर आरोपीला पकडून अटक करण्यात आली. ही कारवाई पोलीस अधीक्षक अर्चित चांडक, अपर पोलीस अधीक्षक बी. चंद्रकांत रेड्डी, उपविभागीय पोलीस अधिकारी वैशाली मुळे, स्थानिक गुन्हे शाखेचे पोलीस निरीक्षक शंकर शेळके यांच्या मार्गदर्शनाखाली पिंजर पोलीस ठाण्याचे ठाणेदार गंगाधर दराडे, पीएसआय अभिषेक नवघरे, पीएसआय गोपाल जाधव, दशरथ बोरकर, गोकुळ चव्हाण, अन्सार शेख, स्वप्नील खेडकर, चालक मनीष ठाकरे, नामदेव मोरे, नागसेन वानखडे, गजानन काळे, प्रदीप धामणे, नागेश दंदी, नरहरी देवकते, भूषण मुखमले, भागवत गांजवे, मयूर खडसे, नजीर हुसैन, गणेश जानोरकर आदींच्या पथकाने केली.
