‘स्टाफ सिलेक्शन कमिशन’ची कडक नियमावली, तर सात वर्षांपर्यंत..

स्टाफ सिलेक्शन कमिशनने आता परीक्षेबाबत नवीन नियमावली जाहीर केली आहे. ज्यात २३ मुद्द्यांचा समावेश करण्यात आला आहे. पेपर संपण्यापूर्वी जर उमेदवार केंद्रातून बाहेर आला. तर एक ते सात वर्षांपर्यंत त्या उमेदवारावर परीक्षेसाठी बंदी घालण्यात येणार आहे. परीक्षेतील गैरप्रकार टाळण्यासाठी हे कडक पाऊल उचलण्यात आले आहे.

सरकारी नोकरीची संधी असल्याने मोठ्या प्रमाणात देशभरातून स्टाफ सिलेक्शन कमिशनच्या परीक्षेसाठी उमेदवार तयारी करतात. गेल्या काही वर्षांत नोकरीसाठी होणाऱ्या भरती परीक्षांमध्ये गैरप्रकार होत असल्याचे आढळून आले आहे. बोगस उमेदवारांचे प्रकारही समोर आले आहेत. त्यामुळे परीक्षेदरम्यान होणाऱ्या अनुचित वर्तन, गैरव्यवहारांबाबत स्टाफ सिलेक्शन कमिशनने २३ कलमी मार्गदर्शक तत्त्वे जारी केली आहेत. परीक्षेदरम्यान गैरमार्गांचा अवलंब करणाऱ्या उमेदवारांना एक ते सात वर्षांपर्यंत परीक्षेपासून बंदी घातली जाईल. त्याच वेळी, वगळण्यात आलेल्या उमेदवारांना आयोगाच्या कोणत्याही परीक्षेला बसण्याची परवानगी दिली जाणार नाही. स्टाफ सिलेक्शन कमिशनने त्यांचे कॅलेंडर जाहीर करण्यापूर्वी उमेदवारांना आधीच सतर्क केले आहे.

उमेदवारांना बाजू मांडण्याची संधी

दरम्यान, या सर्व प्रकारात उमेदवारांना त्यांची बाजू मांडण्याची संधी देखील दिली जाणार आहे. ज्या उमेदवाराला आधीच निलंबित करण्यात आले आहे. त्याला लेखन सहायक म्हणून मानले जाणार नाही, असे स्पष्ट करण्यात आले आहे.

…तर तीन वर्षांची बंदी

परीक्षेला आत सोडण्यापूर्वी संपूर्ण चौकशी, तपासणी आणि कागदपत्रांची पूर्तता असल्यावर प्रवेश दिला जातो. व्हिडिओ, ऑडिओ, ब्ल्युटूथसह सहित अन्य डिव्हाइसचा वापर करताना उमेदवार आढळले तर ३ वर्षांसाठी कारवाई होऊ शकते.